ဝရီးလုပ်တေသူနန့် ယောက္ဖလုပ်တေသူတက်လာ။ ဝရီးလုပ်တေသူကပြော )

“ ယင်းတွက်နန့်ပြောစော်လည်း အစ်ကို....။ စေတနာစော် လူတိုင်းနန့် မထိုက်တန်လို့။ ”

“ ဟုတ်တေ။ ဟုတ်တေ။ ကျွန်တော်လက်ခံရေ။ ”

“ ထော....ဒေဂုကြည့်။ ကျွန်တော့်တူအကြီးကောင်တစ်ယောက် အခက်အခဲဖြစ်နိန်လို့ ညီသည်ဘားကို လားဗျာလ် အကူအညီလားတောင်းခီရေ....”

“ အေး ”

“ ကျွန်တော့်တူ အငယ်ကောင်စော် ကျွန်တော့်တူအရင်းလည်းဖြစ်ယင့်။ သူ့အကြောင်း ကောင်းလည်း မပြောချင် ”

“ ယကေ မပြောကေ့ ”

. “ အဟင့်။ ယကေလည်း ပြောချင်ရေ ”
“ ယကေ ပြော ”
“ လွန်ခရေ နှစ်ပေါင်း(၂ဝ)လောက်ကဆိုကေ ကျွန်တော့်တူအငယ်ကောင်တစ်ယောက် မယားယူဖို့ဖဲသာတစ်ခပ်လည်း မဟိခ။ အစ်ကိုသည်ဘားမှာ ပူဆာရေ။ ယေအခါ အစ်ကိုသည်လည်း မနိန်နိုင်။ မသုံးဝံ့၊ မစားဝံ့ဘဲ စုထားရေ ဖဲသာစကေချေကို ညီမင်္ဂလာဆောင်ဖုိ့အတွက် ဖြည့်ဆီးပီးခရေ။ ထော...ဒေဂု နှစ်ပေါင်း (၂ဝ)ကြာလားခရေနောက်ပိုင်းမှာ ကျွန်တော့်တူအငယ်ကောင်တစ်ယောက် ကောင်းစားဗျာလ် ကြီးပွားချမ်းသာနိန်ရေ။ အစ်ကိုသည်ကျခါ ဒုက္ခတိရောက်လို့။ မယားကရာ ရီပူလောင်။ ဆီးရုံရောက်။ မယားတစ်ဘက်၊ အချေတိတစ်ဘက်နန့်။ သူ့မှာ အလုပ်လုပ်ဖို့အချိန်မရ။ အဂု အချေတိမှာ ကျောင်းဖွင့်နိန်ဗျာလ်။ အချေတိကို ကျောင်းထားပီးဖို့နန့် စာအုပ်စာတမ်းတိ ဝယ်ပီးဖုိ့ ဖဲသာတစ်ဗြားလည်း မဟိ။ မတတ်သာရေအဆုံးမှာ ညီဘားကိုလား။ အကူအညီတောင်း။ ဖဲသာ (၂)သောင်းချီး။ ဖဲသာ (၂)သောင်းဆိုစော်က အငယ်ကောင်ရို့အတွက်ဆိုကေ ယင်းလောက်ထိများစော်လည်း မဟုတ်။ ယေဒါလည်း အငယ်ကောင်က သူ့အစ်ကိုသည်ကို အထက်စီးက အနိုင်ယူဗနာ သူ့အစ်ကိုအခက်အခဲကို မဖြေရှင်းပီးခ။ အရေးမစိုက်ခ။ ဒေချင့် တရားလာ....”
“ ဇာတရားဖို့လဲအစ်ကိုး။ အမှန်ဆိုကေ အစ်ကို့တူအငယ်ကောင် (ကျွန်တော့်ယောက္ဖ)စော် ညီအစ်ကိုချစ်ခြင်းမေတ္တာကို နားလည်သင့်ရေ။ ယဗြီးကေ ကိုယ့်အစ်ကို အရင်းခခေါက်။ အဂုပိုင် အခက်အခဲဖြစ်နိန်စော်ကို သူ့အနိန်နန့် ကြည့်မနိန်သင့်။ ”
“ ယေနန်းရာအစ်ကိုး....။ ယင်းသူ့ကို တစ်ချိန်က ပီးဆပ်ခရေ အစ်ကိုတစ်ယောက်၏ ကျေးဇူးတရားကို ထောက်သင့်ရေ။ ယင်းသူ ကျေးဇူးမကန်းသင့် ”
“ မရအစ်ကို...ကျွန်တော့်ယောက္ဖသည်စော် ဖဲသာစကေဟိလို့ တစ်ယောက်ကိုလည်း ဂရုမစိုက်ဘဲ နှလုံးသားကိုလီပင့် ဘဝင်မြင့်နိန်စောင့်ချင့်။ ဘဝကိုမိန့်ရေအကောင်ကို ယောက္ဖတော်ထားရစော် ဟြက်ဖို့ကောင်းရေအစ်ကိုး....”
“ မေတ္တာဆိုစော် အလားနန့် အပြန်ဟိရေလတ်ကိုး....။ ဒေဂု သူရို့ညီအစ်ကိုနှစ်ယောက်ကိုကြည့်ခြင်းအားဖြင့် မေတ္တာဆိုစော် အလားတစ်ခုတည်းရာဟိရေကား...”
“ အရာရာမှာ ဖဲသာတစ်ခုတည်းကိုဂျေး ဟြိတန်းတင်ဗျာလ် လုပ်လို့မရဆိုစော်ကို ကျွန်တော်သဘောပေါက်လာယင့်ထော။ ဖဲသာထက်မြတ်တေ မေတ္တာတရားသည်သာ စိတ်နှလုံးကိုအီးမြဇီစော်မနား ”
“ အေးလည်းအစ်ကိုး....ယင်းတွက်နန့်လည်း ကြည့်ဗလာချ။ ကျွန်တော့်တူအကြီးကောင်တစ်ယောက် သူ့ညီကို အပြစ်စကားတစ်ခွန်းလည်းမဆိုဘဲ ညီသည်ရို့မိသားစုကိုရာ မုဒိတာပွားဗနာ မေတ္တာပို့နိန်လီယင့်။ သူ့ညီအတွက်ဆိုကေ သူ့မုဒိတာစမ်းရီအိုင်စော် ဘင်္ဂလားပင်လယ်နန့်အတူ ထာဝဇိုင် စီးဆင်းနိန်လီဖို့ဆိုဝါကိုး...။ ”
“ မေတ္တာထားကေ စိတ်နှလုံးငြိမ်းချမ်းရရေလည်းအစ်ကို....”
“ ဟုတ်တေကိုး....ဟုတ်တေ။ ယဗြီးကေ လောကီလူ့ဘုံမှာနိန်ကေ ဒုက္ခတိနန့် လုံးပန်းနိန်ရရေ။ စိတ်ဆင်းရဲစရာတိကြုံရရေ။ အခက်အခဲတိပြည့်နိန်ရေ။ တစ်ချို့ဆိုကေ မေတ္တာတရားတိခေါင်းပါးကတ်တေ။ မဝီးဗြီးလို့မကြည့်ကေ့။ ကျွန်တော့်တူ အငယ်ကောင်ကိုကြည့်ထော။ ယင်းသူ့ပိုင်ဆိုကေ နောင်တမလွန်အတွက် တစ်ခုလည်း အမြတ်ပါဖို့မဟုတ်။ ယင်းနန့် ကျွန်တော်ရို့နှစ်ယောက် မယားလည်း မရ။ ကျားလည်းမကိုက်လို့ အချိန်ဟိတုန်းမှာ ဘုန်းကြီးလုပ်ဇောင် လားကတ်မေကိုး။ ”
“ အူး....ကောင်းရေနန်းရာကိုး..။ ကျွန်တော်လည်း ဘုန်းကြီးလုပ်ဖို့ အဖော်ဟြာနိန်စော်။ သာသနာ့အရိပ်ဆိုစော် လူသားတိအတွက် ငြိမ်းအီးရာအမှန်ချင့်။ သာသနာ့မြီမှာ တရားအလုပ်ကို အားထုတ်ဗျာလ် နိဗ္ဗာန်ကို ရောက်ဖို့အရေး ကြိုးစားဖို့လားကတ်မေ....”
“ ကိုင်း....နိန်မဝင်ခင် ဆရာတော်ကိုလျှောက်ဗျာလ် ဘုန်းကြီးလုပ်ဇောင်လားကတ်မေဖိ။ နိန်ဝင်ကေ မကောင်း။ ”
“ နိန်ဝင်ကေ ဇာဖြစ်လို့လဲကိုး...”
“ နိန်ဝင်ကေ ဆရာတော် ကိုးရီးယားကားကြည့်လို့ ”
“ ဟုတ်လား....”

( နှစ်ယောက်သား ဆင်းလားလီကတ် )


**ဤတွင် မုဒိတာစမ်းရီအိုင်ပြဇာတ် ဗြီး၏ **

--.......
မှ
ု
•*♥*• မာန်ယုကျော် ( ရွှေဝမြေ ) •*♥*•
.

( သမီးချေကို ရွက်လို့ စင်ထက်ကို တက်လာ။ မျက်နှာလည်း မကောင်း။ စိတ်ညစ်နိန်ရေ၊ သနားဖို့ကောင်းရေအမူအယာနန့်။ ဝမ်းနည်းလို့ မျက်ရည်ကျ။ သမီးချေပါးထက်မှာ ကျလားရေ မျက်ရည်စက်ကို သုတ်ပလိုက်တေ )

“ အစကပင် အခင်ထွီးပြောယင့်။ မင်းညီ မင်းကို လလှိုက်လလှဲဟိဖို့လား။ မမိုက်မမဲဟိဖို့လားလို့။ ဒေဂု...ကျွန်တော့်ညီကို မိုက်မဲရေလို့ ဆိုရဖို့လား။ အရေးကြီးလို့ချီးရေဖဲသာ (၂)သောင်းကိုတော့ မချီး။ သားတိဖြုန်းဖို့မှာရေ ဖဲသာ (၅)သောင်းကိုကျခါ ထည့်ပီးဖို့ပျင်နိန်ရေ။ ဟိယင့်သားနန့် မချီးစော်ရာချင့်။ ရရေ....။ ကျွန်တော့်ညီ အဂုပိုင် ချချမ်းသသာနိန်နိုင်စော်ကို မြင်ရကေ ကျွန်တော်ကျေနပ်ယင့်။

. လွန်ခရေ နှစ်ပေါင်း (၂ဝ)လောက်ကဆိုကေ သူ့မှာ မယားယူဖို့ ဖဲသာတစ်ခပ်လည်း မဟိလို့ ကျွန်တော့်မှာ ဟိစော်ချေနန့် သူ့ကို မင်္ဂလာဆောင်ပီးခရေ။ အေး....ယင်းခါလည်း ညီဘားက ရလိုစိတ် မျှော်မှန်းဗျာလ် ကူညီခစော်ကားမဟုတ်ယေ....။ အစ်ကိုရာမနား။ ညီအတွက်ပီးဆပ်ရဖို့။ တစ်သက်မှာ ဒေညီတစ်ယောက်တည်းရာဟိစော်။ ကျွန်တော့်ညီ ဇာပင်ဖြစ်ဖြစ် ကျွန်တော့်ညီကို ကျွန်တော်ချစ်တေ။ ကျွန်တော့်ညီကောင်းစားကေ ကျွန်တော်မုဒိတာပွားပီးနိန်လီဖို့။ ကျွန်တော့်ညီအတွက်ဆိုကေ ကျွန်တော့်မုဒိတာစမ်းရီအိုင်စော် ခမ်းလီဖို့မဟုတ်။ ဘင်္ဂလားပင်လယ်အော်နန့်အတူ ထာဝဇိုင် စီးဆင်းနိန်လီဖို့။ အင်း....အဂု ကျွန်တော်ညီမှာ သားချေနှစ်ယောက် Picnic လားဖို့ ဖဲသာ (၅)သောင်းမှာနိန်ရေ....။ ပို့ဖို့နောက်ကျကေ သားချေတိမာန်ပါလီကတ်ဖို့လတ်။ အယင်စကေ ပို့ဖို့ ပျင်နိန်လီရေ....။ ကျွန်တော့်မှာလည်း သားချေနှစ်ယောက်ကို ကျောင်းထားပီးဖို့နန့် စာအုပ်စာတမ်းတိဝယ်ပီးဖို့ ဖဲသာလိုနိန်ရေ။ ဖဲသာဟြာလို့ နောက်ကျကေ ကျွန်တော့်ကို သားချေတိ မာန်ပါလီကတ်ဖို့လား။ အချိန်မီဟြာမပီးနိုင်လို့ အဘာတာဝန်မကျီလို့ ထင်လီကတ်ဖို့လား။ ကျွန်တော်မပြောတတ်။ အိမ်ကိုရောက်ကေ သားချေတိကို ဘဇောင်ပိုင်ပြောခီရဖို့လဲချင့်။ မျက်နှာငယ်ငယ်ချေနန့် ကျွန်တော်အလာကိုစောင့်လို့ ဟိလီကတ်ဖို့ယေ။ နိန်လည်း ဝင်နိန်ယာ။ ပြန်ခီရဖို့ချ....”

( ဆင်းလားလီ )


.........
•*♥*• မာန်ယုကျော် ( ရွှေဝမြေ ) •*♥*•
.

( သမီးချေကိုရွက်လို့ စင်ထက်ကိုတက်လာရေ.....။ ထို...ဒေ မော်ကြည့်ဗျာလ် တစ်ယောက်တည်း ပြော )

“ အိမ်း....အိမ်ကတော့ ကောင်း အကြီးရာမနားယေ။ ပျိုင်စီပျိုင်ထောင်။ သံဖြူလည်း မိုးလို့။ ဟိန်း နိန်ယင့်ထော။ ငါ မရောက်စော် နှစ်တစ်ဆယ်ကျော်အတွင်းမှာ ဒေအကောင်ရို့ ကောင်းချမ်းသာလားစော်မနား။ ယောက္ခမတိဘားကလည်း အမွီတိရထားလိုက်တေမနား။ ”

. ( ပြောနိန်ဇိုင်မှာ မပုစိန် တက်လာ။ ယောက္ဖသည်ကို မြင် )
“ ယော်......ယောက္ဖ။ ဇာက လာလဲ ”
“ အေး....ရွာကလာစော်ကား ”
“ အော်...ဟုတ်လား။ အကျွန်ယောက္ဖညီကို ခေါ်လိုက်မေကား။ အဖသည်....”

( စင်အောက်က ထူး )

“ ဟေး...”
“ ဒေမှာ ယောက္ဖရို့ရောက်နိန်ရေထော။ ပါလတ်ချ။ ”
“ အေးေးအး ”

( စာအုပ်တစ်အုပ်ကိုကိုင်လို့ ထွက်ပါလတ်။ စာဖတ်နိန်ခရေပုံပေါက်အောင် မျက်မှန်လည်း တပ်ထား။ ”

“ ယော်....အစ်ကိုကြီး။ ဇာကလာလဲ ”
“ အေးဝေး......ရွာကလာစော်ကား ”
“ သမီချေရာပါရေ။ သားချေတိမပါလား ”
“ မယူခဗျာလ်ဝေး....။ အိမ်မှာ အခင်ထွီးနန့် ထားပခယင့် ”
“ အော်......ယကေ အခင်ထွီးတစ်ယောက်ကား နိန်ကောင်းမနား။ ”
“ အေး။ ကောင်းရေ။ မင်းရို့ဝါ.......ကျန်းမာကတ်တေမနား။ ”
“ အေးအစ်ကိုကြီး။ နိန်ကောင်းကတ်ယင့်ကား။ ”
“ ယကေ မင်းသားချေတိဝါ.......။ ဇာနှစ်တန်းရောက်ကတ်ယာလဲ။ ”
“ တစ်ယောက်က (၁ဝ)တန်း၊ နောက်တစ်ယောက်က (၈)တန်း။ နှစ်ယောက်စလုံးကို စစ်တွေက နာမည်ကြီး ဘော်ဒါဆောင်တစ်ခုမှာ ထားပစ်ခီယင့်ယေ။ ”
“ ကောင်းရေဝေး။ ကောင်းရေ။ ”
“ မရီးတစ်ယောက် ရီပူလောင်စော်သတင်းကိုတော့ ကြားယင့်။ သတင်းမီးဇောင်လို့လည်း မအား။ အလုပ်တိက ရှုပ်နိန်ရေ။ ”
“ ရရေဝေ.......မင်းမရီးလည်း ဒေဂုတော့ သက်သာနိန်ဗျာလ်ကာယေ....”
“ အင်း.......ကောင်းရေ။ ကောင်းရေ။ ”

(သမီးချေကိုနမ်းဗျာလ် ပြော )

“ အဝေး....ငါ.......မင်းရို့ဘားက အကူအညီတစ်ခုလောက်တောင်းချင်ရေ...”
“ ဇာလေအစ်ကိုကြီး ”
“ ငါ....ဒေဂု သားချေတိကို ကျောင်းထားပီးဖို့နန့် စာအုပ်စာတမ်းတိဝယ်ပီးဖို့ ဖဲသာစကေ လိုနိန်ရေ။ ယင်းတွက်နန့် မင်းရို့ ငါ့ကို ဖဲသာ နှစ်သောင်းလောက် တစ်ခေါက်ချေချီးဝေး။ ငါ့မှာလည်း ကောင်းအခက်အခဲဖြစ်နိန်လို့ရာ....”

( လင်မယားနှစ်ယောက် တစ်ယောက်မျက်နှာကိုတစ်ယောက် ကြည့်လိုက်ကတ်။ မျက်နှာတိ ချက်ချင်းပျက်လားရေ။ )

“ ကောင်းဂွကျရေမနားယေအစ်ကိုကြီး....။ ”
“ အဆင်မပြေနိုင်လားဝေး......”
“ အေး....အစ်ကိုကြီးလိုနိန်ရေ ဖဲသာ ကျွန်တော်ရို့မှာ ဒေဂု မဟိသိကာ....။ ဖုန်းခသွင်းခီစော်မှာ ဝင်ပါလားရေထော....”
“ တစ်ခေါက်ဟြာကြံပီးဖိဝေ.....မင်းကိုအားကိုးလို့ လာစော်ကား။ ”
“ ဇာက ဟြာခီရဖို့လဲချင့်။ ဖြစ်နိုင်ဖို့ဆိုကေ အရာတစ်ယောက်ကရာ ချီးခီဖိအစ်ကိုကြီး။ ”

( ပြောနိန်ဇိုင်မှာ အနားမှာ ဟိရေ ဖုန်းမြည်လာ။ မပုစိန် ဖုန်းပြော )

“ ဟဲလို....သားကြီးလား။ အေး...မေမေပြောနိန်စော်။ အင်း။ ပြော။ သူငယ်ချင်းတိနန့် Picnicလားကတ်ဖို့။ ဖဲသာ (၅)သောင်းလိုနိန်လား။ အေးအေး။ အယင်ထည့်ပီးလိုက်မေ။ စိတ်ချလီဖိနန်း။ ”
“ သားကြီးရို့ဘားကလားဟေး....”
“ အေး...ဟုတ်တေ။ သားကြီးရို့မှာ သူငယ်ချင်းတိနန့် Picnic လားကတ်ဖို့ ဖဲသာ (၅)သောင်းလိုနိန်ရေဆိုဝါ.......။ အယင်စကေ ထည့်လိုက်လတ်။ ”
“ အေးအေး။ ထည့်လိုက်ရဖို့နန်းရာ။ အရာ....နောက်ကျကေ သားချေတိ မာန်ပါလီကတ်ဖို့ယေ...”

( အစ်ကိုက ပြော )

“ အဝေး...ယကေ အစ်ကိုကြီးပြန်လိုက်ဖို့ဗျာလ်.....”
“ အေးအေး။ ”

( အစ်ကိုသည် မျက်နှာငယ်ငယ်နန့် ဆင်းလားလီ )
“ ယကေအဖသည်....သားချေရို့အတွက်ဖဲသာကို အံဆွဲထဲက ယူပို့လိုက်ဖို့ဒေ....”
“ အေး....ယင်းမက ယူလိုက်ဖိ ”
“ နောက်မကျခင် ပို့ပစ်ခီမေချ.....”
“ အင်းအင်း ”

( မယားဆင်းလား။ လင်တစ်ယောက်တည်းပြောကျန် )

“ ဟင်း....အစ်ကိုကြီး......အစ်ကိုကြီး.....။ ဖဲသာပီးဖို့ကားမလာ။ ချီးဖို့ရာလာရေ။ ဇာဖုိ့ချီးဖို့လဲ။ မချီး။ ယုံရဖို့စော်မဟုတ်။ ဒေလောကမှာ ဖဲသာနန့် ပတ်သက်လာကေ တစ်ယောက်ကိုလည်း မယုံ။ ချီးလိုက်ကေ ကျေးဇူးတင်တော့ ခံရဖို့။ ယင်းကျေးဇူးကို ဇာလုပ်ဖို့လဲ။ ချက်စားလို့ရစော်လည်း မဟုတ်။ အလကား ကျေးဇူး။ တစ်ယောက်ကိုလည်း စေတနာ၊ မေတ္တာထားစော်မကောင်း။ ကိုယ့်စော်နန့်ကိုယ် နိန်ဖို့။ ကိုယ်ရို့မှာ ချချမ်းသသာနန့် အကြောင့်မကြနိန်နိုင်ကေ ဗြီးယာ။ တစ်ယောက်ကိုလည်း အရေးစိုက်စရာမလို.....”

( ပြောဗြီး ဆင်းလား )

........
•*♥*• မာန်ယုကျော် ( ရွှေဝမြေ ) •*♥*•
.

( ဝရီးလုပ်တေသူ တက်လာ။ ဖုန်းအပျက်လည်း တစ်လုံးပါရေ )

“ အင်း....ပရိသတ်ကိုပြောရဖို့သိ။ ကျွန်တော့်ညီမှာ မနီ ဆိုရေ သမီးချေတစ်ယောက်ဟိရေ....။ ကျွန်တော်နန့်ဆိုကေ ကောင်းကောင်းချစ်ကတ်တေ။ အဂု ယင်းကောင်မချေစော် ရန်ကုန်မှာအလုပ်လုပ်နိန်ရေလတ်။ ကျွန်တော်မမွီးခင်ကပင် အလုပ်လုပ်ဖို့လားခစော်။ အဂု မတွိစော်လည်း ကြာယာ။ ယင်းသူ့ကို ဖုန်းတစ်ခေါက် ဆက်ကြည့်လိုက်ရဖို့ချ.....”

( ဖုန်းဆက် )

( ခလုပ်နှိပ် )

. “ သုည သုည၊ ဇီရို ဇီရို၊ ဝလုံး ဝလုံး၊ အို အို......ဟဲလို....မနီလား။ အေး....ငါရာ....နင်နိန်ကောင်းရေမနား။ အေး....ငါလည်း နိန်ကောင်းရေ။ နင် အဂု ဇာလုပ်စားနိန်လေ။ ဇာဟင့် နင်ရန်ကုန်မှာ ဖာ လုပ်စားနိန်ရေ။ အော်...ငါထင်စော် ဖာ မဟုတ်လား။ တော်သိယင့်ဟေး။ ဖာရက်လို့ရောင်းစော်မနား။ အမ်... ငါ့ဘားက အကူအညီတစ်ခု တောင်းချင်လို့...။ ဇာအကူအညီလဲ။ ပြော။ ဇာဟင့်။ နင်ရို့အိမ်မှာ မိုးရွာကေ မိုးယိုရေ။ ဇာလုပ်ရဖို့လဲ။ ဇာလုပ်ရဖို့လဲယေ...။ ဖာခံနန်းရာ။ အေး....မိုးရွာကေ ဖာခံ။ နင်ပဲ တနားက ဖာရက်လို့ ရောင်းစားရေဆို....။ အေး....ယင်းဖာတိကို မိုးယိုစော်နားတိမှာလားဗနာ ခံလို့ ပြောစော်။ ဒေကောင်မချေလည်း ကောင်းရာမနား။ အမ်....အရာလည်း အကူအညီတစ်ခု...။ ပြော....။ ဇာချင့်။ ညဇာဘက်နီဝင်ကေ နင်ကြောက်တေ။ ဇာလုပ်ရဖို့လဲ။ မကြောက်ကေ့။ မကြောက်ကေ့။ နီဝင်လာလို့ နင်ကြောက်တေဆိုကေ နင့်လင်ထိုးဖို့ လှံ(ဒေနိန်ရာမှာ အဓိပ္ပာယ် လွဲမှားနိုင်ရေ) ပီးလိုက်။ နင့်လင်ထိုးပတ်ဇီ။ လှံရာပီးလိုက်။ ဇာချင့်...။ ငါပြောစော် ယင်းချင့်မဟုတ်။ ညဇာတိုင် နီဝင်ကေ သူခိုးတိ နင့်အိမ်က ခိုးဖို့လာကေ နင့်လင်ထိုးဖို့ လှံကိုပီးလိုက်လို့ ပြောစော်။ အဘာလေဟေ.....နင်လည်း အဓိပ္ပာယ်ကောက်ကေ ပါဝါနက္ခတ်တိမတင်ဘဲ ဒဲ့ဇီကောက်စော်မနှင်း။ သီရဖို့။ ဟေး....မနီ....နင့်ကို ငါတစ်ခုမိန်းကြည့်ရဖို့သိ။ ထိုချင့်လေ....နင်....ရန်ကုန်မှာ ဖာရောင်းစားကေ နင့်ဘားက ဖာဝယ်ဖုိ့ အပျိုကြီးတိဘာတိ မလာကတ်လားဟေး...။ အေး....ငါ့အတွက် တစ်ယောက်လောက်ဟြာထားဗလင်။ ငါလည်း ဒေမှာ လပျိုကြီးဘဝနန့် အရိုးထုတ်နိန်ရရေဂါး...။ ငါ.....အသက်တော့ ယင်းလောက်မကြီးသိဟေး...။ (၄ဝ)ကျော်လို့ (၁၆)နှစ်ထဲကို ဝင်သိဂါး။ အေး....ယေကေလည်း Small ချေတိက ငါ့ကို တစ်ယောက်လည်း မကြိုက်ကတ်မြင်ယင့်။ ယင်းတွက်နန့် ငါ့အတွက် တစ်ယောက်လောက်....အမ်...အမ်....ဟြာထားဗြီးယာလား။ အလှပလားဟေး....အေ....အပျိုမ မလား။ ဇာဟင့်ဟေ.....အပျိုတော့ အပျို....။ သားချေ(၃)ယောက်ဟိရေ။ ထွီး...သားချေ(၃)ယောက်ဟိနိန်ယာ။ အရာလည်း အပျိုစစ်ဖို့သိလားယေ။ ထားဟေး....ထားဖိ။ ငါ့ဘဝမှာ မယားမရကေလည်းဟိပတ်ဇီဖိ။ ယင်းပိုင် သားချေ(၃)ယောက်ဟိရေ မော်ဒယ်လ်အပျိုကြီးကိုတော့ခါ မလိုငါ....။ ဒေဂုခိုက်မှာမမတိကို အပျိုစစ်၊ မစစ် တစ်ယောက်လည်း မယုံရ။ ကိုင်း....ကိုင်း....မီတာတိလည်း တက်နိန်ယာ(အောက်ကို ငုံ့ကြည့်ဗျာလ်) ငါ.....အိမ်သာတက်ဝင်ခီရဖို့...အဲ...အဲ....ယောင်လားစော်ရာ...ဟဲဟဲ။ နင် ပြောစရာဟိသိလား။ မဟိကေ ငါ ဖုန်းချလိုက်ဖို့ဗျာလ်ကား။ အေး....ဖုန်းချလိုက်ဗျာလ်နန်း ”

( ဖုန်းပြေဗြီးစော်နန့် တူသည် သမီးချေကိုရွက်လို့ တက်လာ )

“ အူး...အခင်ထွီးကား ဒေမှာမနား။ ဖုန်းလည်းတစ်လုံးကာ...။ ဇာကလဲချင့်။ ”
“ အေးဝေး...ထိုဖက်အိမ်က ဝေးသတ်ထားစော်ကို ငါကောက်ထားစော် ”
“ ယကေ အကောင်းလားချင့် ”
“ ဝေးသတ်ထားစော်ဆိုမှ အကောင်းဟိဖို့လားဝေ ”
“ ယေကေ အသစ်မနားယေ....”
“ မင်းဖ....! အကောင်းမဟုတ်ဆိုမှ အသစ်ဟိဖုိ့လားဆွေ....။ လပေါ ”
“ ဟုတ်ဗျာလ် ဟောင်း ဟောင်း.... သစ်သစ် ထားလိုက်ဖိ။ အခင်ထွီးနန့် ကျွန်တော်တိုင်ပင်စရာဟိရေ ”
“ ဇာလေ...ပြော ”
“ အေး....ကျွန်တော်ရို့မိသားစုအခြေအနေကိုလည်း အခင်ထွီးသိရေအတိုင်းရာယေ။ ဒေမမချေအမိကို ဆီးရုံတင်လိုက်ရလို့ ကျွန်တော့်မှာ စုဟိဆောင်းဟိထားခရေ ဖဲသာချေ၊ ဒင်္ဂါးချေတိလည်း အားလုံး ပြောင်သလင်းခါလားရေ။ ဒေသူ့အမိနန့် ဒေအချေ(၃)ယောက်ကို ပြုစုပီးနိန်ရလို့ ကျွန်တော့်မှာ အလုပ်လုပ်ဖို့အချိန်လည်းမရ။ ”
“ အေး...ငါသိရေလေ....”
“ ထော....ဒေဂု....။ သားချေရို့မှာ ကျောင်းဖွင့်နိန်ဗျာလ်။ သားချေရို့ကို ကျောင်းထားပီးဖို့။ စာအုပ်စာတမ်းတိဝယ်ပီးဖို့ လက်ထဲမှာ ဖဲသာတစ်ဗြားလည်း မဟိ။ ”
“ ယကေ မင်း ဇာဖြစ်ချင်လေ။ ”
“ ယင်းတွက်နန့် ကျွန်တော် အဂုလောလောဆယ် သားချေတိကို ကျောင်းထားပီးးဖို့နန့် စာအုပ်စာတမ်းတိဝယ်ပီးဖို့ ဖဲသာ(၂)သောင်းလောက်လိုချင်ရေ။ ”
“ ငါ First year ကောင်မချေဘားက လားချီးပစ်ခီမေ ”
“ မချီးကေ့အခင်ထွီး....”
“ ဇာဖြစ်လို့လဲဝေး.....”
“ ယင်းကောင်မချေတိ ကောင်းစိတ်ပုပ်ကတ်တေလို့ ပြောသံကြားရေ။ ”
“ ယကေ....မင်း ဇာပိုင်ကြံဖို့လဲ ”
“ ကြံဖို့နည်း တစ်ခုတည်းရာ ဟိရေ ”
“ ဓါးမြနှက်ဖို့စော်လာ....။ ငါမလိုက်နန်း။ အစကပင်ပြောထားယင့်ကား ”
“ အူး....မဟုတ် အခင်ထွီး ”
“ ယကေ ပြောလေ။ ”
“ ထိုဘက်ကမ်းမှာ ဟိရေ ကျွန်တော့်ညီဘားကိုလားဗနာ အကျိုးအကြောင်းပြောလို့ ကျွန်တော်လိုနိန်ရေ ဖဲသာကို ချီးကြည့်ကေ ကောင်းဖို့လားလို့ ”
“ ဖြစ် ဖို့လားဝေး......”
“ ဇာဖြစ်လို့လဲ အခင်ထွီး ”
“ မင်းညီတစ်ယောက် ဒေဂု စီးပွားရေအခြေအနေတိကောင်းဗျာလ် ယင်းရွာမှာ ချမ်းသာနိန်ရေလတ်။ ”
“ အေး....ဟုတ်တေလေ။ ကျွန်တော်လည်း သိစော်မနား။ ”
“ အေး....နောက်ဗြီးကေ မင်းညီစော် ဖဲသာအရှိန်နန့် ဘဝကို မိန့်ဗျာလ် နှလုံးသားကို လီပင့် ဘဝင်မြင့်နိန်ရလုိ့ ပြောသံကြားရေဝေး....”
“ အာ........ဇာသူ ဇာပင်ပြောပြော။ ယင်းသူ ဇာပင်ဖြစ်ဖြစ်....ကျွန်တော့်ကိုတော့ လှလှိုက်လလှဲဟိဖို့စော်ရာ အခင်ထွီး...”
“ အေး....လှိုက်လဲဖို့လား။ မိုက်မဲဖို့လားဆိုစော်ကိုတော့ စောင့်ကြည့်ရဖုိ့ပါ့ယေ...။ ယင်းပိုင်ဆိုကေ မင်း ယင်းသူ့ဘားကို ဇာနိလားဖို့လဲ။ ”
“ နက်ဖန်ခါ....”
“ အင်း။ ကောင်းရေ....”
“ ကိုင်း...ကျွန်တော်ရို့ပြောနိန်ကတ်စော်လည်း ကြာနိန်ဗျာလ်။ ထမင်းစားဖို့ သားချေလည်း ဇာကိုလားခကတ်လေမသိယာ။ ”
“ တနားကတော့ဝေး....Second year က နှစ်ကောင်နန့် သရီကွင်းပစ်တမ်း ကဇာတ်လို့ မြင်လိုက်တေယေ။ ရရေ....ငါဟြာပစ်ခီမေ ”
“ အေး....ယင်းပိုင်ဆိုကေ သားချေရို့ကို အခင်ထွီးဟြာပစ်ခီ။ ကျွန်တော် သမီးချေကိုသိဗျာလ် ထမင်းစားဖို့ ပျင်ထားလိုက်မေ ”
“ အင်း။ ကောင်းယင့်။ ”

( နှစ်ယောက် ဆင်းလားလီကတ် )

.......
•*♥*• မာန်ယုကျော် ( ရွှေဝမြေ ) •*♥*•
.

(ယောက္ဖလုပ်တေသူ လွယ်အိပ်တစ်လုံးလွယ်လို့ တက်လာ။ လက်မှာ ဆိုင်ကယ်နောက်ကြည့်မှန်တစ်လက်ကိုလည်း ကိုင်ထားရေ။ စင်ထက်မှာ မှန်ကို “အပြန်”ကြည့်ဗျာလ် အလှဆင်။ ဂေါင်းဖြီး။ ယင်းအချိန် ဝရီးလုပ်တေသူ တက်လာရေ....ဝရီးစပြော....)

“ ယာ.....အစ်ကိုး....မတွိရစော် ကြာဗျာလ်ထော....”

“ အေးကိုး...ယာ....”

(နှစ်ယောက် ပပျော်ရဟြွင်ဖက်ပလိုက်ကတ်။ ဝရီးလုပ်တေသူကမိန်း....)

.
“ ယကေ....အစ်ကိုဇာသူလဲ....”
“ ထွီး...သိလည်း မသိကတ်ဘဲနန့် အလိုလိုဖက်ပလိုက်ကတ်ဖို့။ ငါကား သိရေလားလို့။ အစ်ကိုကား ဇာက....”
“ ကျွန်တော်( )မှာ ဝရီးမနားယေ....”
“ ယော်....အမျိုးတိမနားဂု....။ ကျွန်တော်လည်း အစ်ကို့ညီမှာ မယားမှာ မောင်ဒေ....”
“ ဟုတ်လာ...ယော်...အမျိုးတိမနားယေ။ ယကေ အစ်ကို ဒေနားမှာ ဇာလုပ်နိန်စော်လေ။ ”
“ ထော...အဝတ်ခြုပ်စော်အပ်(၁)ချောင်းဝယ်ဖို့အတွက် စစ်တွေကိုလားဖို့ ကားစောင့်နိန်စော်....”
“ ဇာနှစ်နာရီကားကိုလဲ ”
“ ၁၂ နာရီကား ”
(နာရီကိုကြည့်....)
“ အန်....ဒေဂု (၃)နာရီတောင်ကျော်နိန်ယာ....”
“ အေး....ယင်းတွက်နန့် ကားမလာသိကာလို့ စောင့်နိန်စော်မနားယေ....”
“ ငပေါ....အရူး...”
“ ဇာဖြစ်လို့လဲကိုး....”
“ ၁၂ နာရီလာဖို့ကားကို ၃ နာရီကျော်မှာစောင့်လို့ရဖို့လား....”
“ ယပိုင်မရလား...”
“ ဇာပိုင်ရဖုိ့လဲယေ...အူး...”
“ ရဖို့လားလို့ စောင့်နိန်စော်မနားယေကိုး.....”
“ ကိုင်း...အစ်ကိုကားလည်း မမီလိုက်ယာ။ နက်ဖန်မှလိုက်လီဖိ။ ဒေနိ ကျွန်တော်ရို့ဘားမှာထမင်းစားဗျာလ် တစ်ညည့်အိပ်လီဖိ ”
“ အေးအေး....ယပိုင်ဆိုလည်းကောင်းယင့် ”
“ ယေကေ....အစ်ကို့ကို ထမင်းကျွေးဖို့အတွက် အစ်ကို ဇာတိ ဇာတိ စားပြီးကေ ဇာတိကို ရှောင်လဲဆိုစော်ကို တစ်ခေါက်ပြောပြဗလင်....။ အရာ...ချက်ထားဗြီးမှ ထိုချင့်မစား၊ ဒေချင့်မစားဆိုကေ မကောင်းဗျာလ်မနားယေ....”
“ အေး...အစ်ကိုး...။ ကျွန်တော်မစားစော်တိဟိရေ....။ ”
“ အင်း......ပြောဇမ်.....ဇာတိဇာတိမစားလဲ ”
“ ရီသတ္တဝါဆိုကေ သင်္ဘောတိ၊ ဘုတ်တိ၊ သမ္ဗာန်တိ၊ လောင်းတိကို မစားကိုး....။ ”
“ အူး....သားကြီးငါးကြီးတိကို ရှောင်စော်မနားဂု....ဟုတ်ဗျာလ်....ကုန်းသတ္တဝါမှာဆိုကေဝါ....ဇာတိကိုရှောင်လေ...”
“ ကုန်းသတ္တဝါဆိုကေ...လေယဉ်ပျံတိ၊ ကားတိ၊ စားပွဲခုံတိ၊ ကုလားထိုင်တိကို မစား။ ရှောင်ရေ...”
“ အဘာလေ....ဧရာမ ဖုတ်ကောင်ကြီးနန့် တွိနိန်စော်မနား....။ သီရဖို့....။ ကိုင်း....ထမင်းမစားခင် ကျွန်တော်ရို့ တစ်ခွက်တစ်ဖလား ဆွဲဖို့လားကတ်မေ....”
“ အိုကေ....လားမယ်....”

( နှစ်ယောက်သား ဆင်းလားလီကတ်။ တအောင့်ချေကြာစော်နန့် ဒယောတိကို ဇလွယ်သိုင်းဗျာလ်၊ ပုလင်းကိုယ်ဇီနန့် မူးဗနာ တစ်ယောက်လိုင်ကို တစ်ယောက်ဖက်လို့ တက်လာကတ်။ ယောက္ဖလုပ်တေသူပြော )

“ အေး.....အစ်ကိုး....ကျွန်တော်ရို့ two ယောက်လည်း very မူးနိန်ကတ်ယာ....”
“ အင်္ဂလိပ်စကား ကောင်း မပြောကေ့လေ့ကို....”
“ ပြောကေ ဇာဖြစ်လေကိုး...”
“ ယကေ....ယလောက်ပင် အစ်ကိုအင်္ဂလိပ်စကားကျွမ်းလာ....”
“ အူး....ကျွမ်းတောင်ဇာကဖို့လဲယေ....။ “အင်း” က “လိပ်”ကို သီဗြီးမှ ဖမ်းနိုင်လို့ အင်္ဂလိပ်ဆိုင်ရာ Noble ဆုကို ရထားရေအကောင်ကိုး....။ အစ်ကိုဇာမှတ်လေ....”
“ ယလောက်ပင် အစ်ကိုအင်္ဂလိပ်စကားကျွမ်းကေ ကျွန်တော် မေနိ(meaning)စကေ မိန်းမေအစ်ကို့ကို ”
“ ပျင်းရေနန်းရာ...စမ်းကြည့်လိုက်လေ....”
“ ယပိုင်ဆိုကေ ခရုချေကို အင်္ဂလိပ်ပိုင် ဘဇောင်ခေါ်လေ....”
“ စုပ် ပစ် ” ( ခရုကို စုပ်ရေပုံစံပြဗျာလ် ပြောလိုက်စော်ဖြစ်တေ )
“ စေတီကိုဂါ....”
“ ရစ် ရှုး ”
“ ငရုပ်သီးကို....”
“ ချီလီ ”
“ ငရုပ်သီးခြောက်ကို.....”
“ ချီလီခြောက် ”
“ အဘာ....ဘဇောင်ပိုင်တော်ရေနန်း....”
“ အစ်ကိုး.....အစ်ကိုကျွန်တော့်ကိုဥာဏ်စမ်းထားဗျာလ်နှမ်း...။ အဂု ကျွန်တော်အစ်ကို့ကို မိန်းဖို့ ”
“ ဇာမိန်းဖို့စော်လေ။ မိန်း။ ဆရာကြီးလုပ်လိုက်မေချ ”
“ ဒေပိုင်အစ်ကိုး....သကြားပုံနန့် ဆားပုံကို ထိုး.......အဝီးကြီးမှာထားဖို့။ ဇာဟင့်က ဆားပုံ၊ ဇာဟင့်က သကြားပုံဆိုစော် အစ်ကိုပြောရဖို့။ ဇာဟင့်ကိုကြည့်လို့ အစ်ကိုပြောဖို့လဲ ”
“ အူး....အလွယ်ချေရာမနှင်းချင့်။ ယင်မနားစော်အပုံစော် ဆားပုံ၊ ယင်နားစော် အပုံစော် သကြားပုံ ”
“ ဇာဖြစ်လို့...”
“ ဇာဖြစ်လို့ဆိုကေ သကြားစော်အချိုမနား။ အချိုဆိုကေ ယင်နားရေ။ ယင်းတွက်နန့် ယင်နားစော်အပုံစော် သကြားပုံ ”
“ ဟုတ်ဗျာလ်....မှန်ရေ....။ ယင်းပိုင်ဆိုကေ အပျိုမချေတစ်ယောက်နန့် ဝါကြီးမတစ်ယောက်ကို အားလုံးဆင်တူဝတ်ဗျာလ် အဝီးကြီးမှာ ထားဖို့။ ဇာဟင့်က အပျို...ဇာဟင့်က အအိုဆိုစော် အစ်ကို မှန်းနိုင်ဖို့လား ”
“ ယင်မနားစော် အပျို....ယင်နားစော် အအိုမနားယေအစ်ကိုး....။ ”

( ပြောဗြီးဆင်းလားကတ် )

.......
•*♥*• မာန်ယုကျော် ( ရွှေဝမြေ ) •*♥*•
.

( ဝရီးလုပ်တေသူ တက်လာ )

“ အင်း....ပရိသတ်ကိုပြောရဖို့သိ။ ဒေနှစ် စစ်တွေတက္ကသိုလ် အင်္ဂလိပ်စာမေဂျာမိသားစု Fresher Welcome ပွဲမှာ ပြဇာတ်ချေတစ်ပုဒ် သရုပ်ဆောင်ဖို့လို့ ပြောသံကြားပါရေ။ ယင်းပြဇာတ်ချေထဲမှာ သတင်းကြေငြာရေ အခန်း(၁)ခန်းပါလို့ စီစိုင်သူ ကိုမာန်ယုကျော်စော် ကျွန်တော့်ဘားက စစ်တွေတက္ကသိုလ်နန့်ပတ်သက်တေ သတင်းတစ်ပုဒ် တောင်းထားပါရေ။ ယေဇူးနန့် ကျွန်တော်လည်း ညဇာကခါ သတင်းတစ်ပုဒ် မရွီးတတ်၊ ရွီးတတ် ရွီးကြည့်လိုက်ပါရေ။

. ( အင်္ကျီအိပ်ကို နှိုက်ဗျာလ်ပြော )

“ ဒေဂုတောင် ပါလာသိမသိ။ အော်...အေး...။ ပါလာရေထော....။ ဇာချင့်.....?? ယင်းသတင်းကို တစ်ခေါက်ချေ ဖတ်ပြပီး။ အေး.....ပရိသတ်က တောင်းဆိုလာကေတော့ခါ ဖတ်ပြရဖို့ဗျာလ်ယေ...။ ဖတ်ပြပါမေနန်း။ နားထောင်ကတ်ပါ ”

( သတင်းကို ဖတ်ပြ )

“ အဟမ်း...အဟမ်း...အားလုံး အညာစီယို....ဒေနိန့် ၁၃၇၁ ခု၊ သီပေါမင်းဆိုက္ကားထက်က လူးကျရေနိန့်၊ ၂ဝ၁ဝ ခု၊ မင်းတုန်းမင်းဝမ်းကျရေနိန့်၊ ဒေနိန့်မှာ ကျွန်တော်ရို့ ချစ်တေ စစ်တွေတက္ကသိုလ်၏ လတ်တလောဖြစ်ပျက်နိန်ရေ သတင်းချေတိကို စုစီးလို့ ကြေငြာတင်ပြပီးလားဖို့ ဖြစ်ပါရေ....။
သတင်းဂေါင်းဇိုင်....ဖင်လန်နိုင်ငံ အီစီကလီဝန်ကြီးချုပ် မစ္စတာဝက်ကလီစာနန့်အဖွဲ့စော် ရခိုင်ပြည်နယ် စစ်တွေမြို့၊ ဘုမေရပ်ကွက်မှာဟိရေ စစ်တွေတက္ကသိုလ်ကို လွန်ခရေနိက လေ့လာရေးခရီးလားခီရေလို့ သတင်းရဟိထားပါရေ။
သတင်းအပြည့်အစုံမှာ - မစ္စတာဝက်ကလီစာ၏ ထွက်ဆိုချက်အရ လက်ရှိ စစ်တွေတက္ကသိုလ်၏ကားခမှာ ၅ဝိ/- ကနိန်လို့ ၁ဝဝိ/- အထိ ထိုးတက်နိန်ဗျာလ်ဖြစ်လို့ ကျောင်းသား/သူတိအနိန်နန့် နှာခေါင်းငြိုနိန်ကတ်ကြောင်း၊ ကျောင်းသား/သူတိက ဒေကိစ္စကို မကျေနပ်လို့ ကားသမတိကို ကားခလျော့ပီးဖို့ပြောရေခါ ကားသမတိက ဆီဈီးတက်လို့ ကားခတင်ရစော်လို့ ပြောကြောင်း၊ ဆီဈီးကို လေ့လာကြည့်ရေခါ အယင်က တက်ခစော်မှန်ကေလည်း ဒေဂုအခါ ပုံမှန်ဈီးဖြစ်လားဗျာလ်ဖြစ်ကြောင်း၊ ယေဒါလ်ည်း ကားခဈီးတော့ခါ အဂုထက်ထိ မကျသိကြောင်း၊ ဒေကိစ္စနန့်ပတ်သက်လို့ ကျောင်းသား/သူတိက ငရဲမင်းနန့် သိကြားမင်းရို့ကို တိုင်ကြားလားဖို့ အစီအဇိုင်ဟိကြောင်း ကြားသိရပါရေ။
နောက်သတင်းတစ်ပုဒ်ကတော့ခါ ဘုမေရပ်ကွက်အတွင်းမှာဟိရေ စစ်တွေတက္ကသိုလ် ကားလမ်းပျက်စီးနိန်မှုအကြောင်းပါ။ အယင်တစ်ရက်နိန့်က အင်္ဂလိပ်စာ၊ တတိယနှစ်က ကိုကေအေတီတစ်ယောက် ကားစီးလို့ တက္ကသိုလ်တက်ဇောင်လားရေခါ ဘုမေကိုအရောက်....လမ်းကပျက်၊ ကားက ဆောင့်ရေအတွက်ကြောင့် ကားအမိုးနန့် သူ့ဂေါင်းတိုက်မိလို့ ကေအေတီတစ်ယောက် ဂေါင်းကွဲလားပါရေလတ်။ ယင်းနန့် သူ့ဂေါင်းဒဏ်ရာကို ဆီးခန်းသို့ လားပြရေအခါ ဆီးခန်းက Nurse တိက ဇာဖြစ်လာစော်လဲလို့ မိန်းစော်ကို ကေအေတီက ဝမ်းတိခဲဗျာလ် ခြီကျိုးလာစော်လို့ အမှားမှားအယွင်းယွင်းဖြေရေအတွက်နန့် Nurse တိက သူ့ကို သွားခြောက်ချောင်းနှုတ်ပီးလိုက်ကြောင်း၊ သွားဖုံးအတုတစ်ခုလည်း မေတ္တလက်ဆောင် တပ်ပီးလိုက်ကြောင်း “ A B C D ” သတင်းဌာနမှာ ဖော်ပြထားပါရေ။
နောက်ထပ်သတင်းတစ်ပုဒ်ကို ကြေငြာတင်ပြပီးလားပါမေ။ စစ်တွေတက္ကသိုလ်၊ အင်္ဂလိပ်စာအဆောင်၊ အထက်/အောက်၊ ဂျောင်ကြိုဂျောင်းကြား၊ ဒေါင့်ကြိုဒေါင့်ကြား၊ အခန်းကြိုအခန်းကြားတိမှာ ကွမ်းရည်တိနန့် ပုံဖော်ထားရေ မော်ဒန်ပန်းချီလက်ရာတိကို တွိနိန်ရကြောင်း၊ ယင်း နာမည်မသိ ပန်းချီဆရာတိ ပုံဖော်ထားရေ မော်ဒန်ပန်းချီပုံတိကို Internet websites တိမှာ တင်ဗျာလ် ဒေါ်လာနန့် လေလံပစ်ဖို့လို့ အင်္ဂလိပ်စာ တတိယနှစ်မှ ကျောင်းသား/သူတိ စီဇိုင်နိန်ကတ်ပါရေ။ ဒေပိုင် စီဇိုင်နိန်ကတ်တေအခါ E C ဖြစ်တေ ကို( )နန့် ကို( ) ရို့နှစ်ယောက် သဘောထားချင်းမတိုက်ဆိုင်လို့ ရန်ဖြစ်ကတ်ပါရေ။ ယင်းပိုင် ရန်ဖြစ်ကတ်တေခါ E C ဖြစ်တေ ကို( )က ကို( )ကို လက်သီးနန့် ထိုးပစ်လို့ ကို( )တစ်ယောက် ဘယ်ဘက်ပါး ညာဘက်ကိုရောက်လားခကြောင်း အင်တာနက် သတင်းတစ်ပုဒ်မှာ အတိအကျ ဖော်ပြထားပါရေ။
အရာသတင်းတစ်ပုဒ်ကတော့ခါ အင်္ဂလိပ်စာ တတိယနှစ်က ကို( )တစ်ယောက် တစ်ခြားမေဂျာက မမချေတိကိုလိုက်လို့ နတ်ယောင်ဂါးခံရေအခါ မမချေတစ်ယောက်က မကျေနပ်လို့ သူ့အိုးနန့် ကို( )“ ပါး ”ကို မှတ်လောက်သားလောက်အောင် သတ်ပစ်လို့ ကို( )တစ်ယောက် နှာခေါင်းက မီးထတောက်ဗျာလ် ဆံပင်တစ်စိတ်ကာ မီးလောင်လားကြောင်း သတင်းရဟိထားပါရေ။
လွန်ခရေ နှစ်ရက်က အင်္ဂလိပ်စာမိသားစု Fresher Welcome ပွဲကျင်းပနိုင်ဖို့အတွက် ဆွေးနွေးကတ်တေအခါ ပထမနှစ်က မောင်ချလူးအောင်က ပွဲလုပ်ဖို့အစီအဇိုင်ကို မကျေနပ်လို့ ကို( ) ကို လက်သီးနန့်ထိုးပစ်တေအခါ ကို( )မှာ သွား(၃)ချောင်း ဝမ်းထဲကိုဝင်လားခကြောင်း၊ ကို( )က ဒေကိစ္စကိုမကျေနပ်လို့ ရဲစခန်းမှာ လားတိုင်ခီပါရေ။ စခန်းက ကို( )ကို ဒေပိုင် လူဘားမှာ မတရားအသတ်ခံလာရလို့ ဒဏ်ကြေးငွေ (၈ဝဝဝိ/-)တိတိကို တောင်းခံလို့ ကို( )တစ်ယောက် နဗန်းစတိ အထသို့ထောင်တက်ဗျာလ် စခန်းက ကဗျာကယာ ထွက်ပြီးပါလတ်ကြောင်း “ ရက်မိရက်ရာသတင်းဌာန ”မှာ ဖော်ပြထားပါရေ။
ကျွန်တော့်မယားအချေမွီးရေနိက ဒုတိယနှစ်က ကို( )တစ်ယောက် အင်္ဂလိပ်စာအဆောင်ကနိန်ဗျာလ် Canteen ကိုအလား....သူ့ဟြိမှာဟိနိန်ရေ Botany ပထမနှစ်က ကောင်မချေတစ်ယောက်၏ Body Structure ကိုလေ့လာအကဲခတ်နိန်ဇိုင်မှာ မြက်ပင်ချေတစ်ပင်ကို ခလုတ်တိုက်မိလို့ Canteen ဟြိက ဆင်းကေယားရေ “ ဆင်းယားကန် ”သို့ ဟြိဂျွမ်း၊ နောက်ဂျွမ်း၊ တောင်ဂျွမ်း၊ မြောက်ဂျွမ်း၊ ဟိသမျှဂျွမ်းတိနန့် ဒလိမ့်ကောက်ကွေး လူးဆင်းလားကြောင်း၊ ကန်ထဲက သူပြန်တက်လာရေအခါ ကို( )တစ်ယောက် ကန်ထဲမှာ ဒယောကျွတ်ကျန်ခလို့ ဟြက်ဗျာလ် ဒယောမပါဘဲ တက္ကသိုလ်ထဲက ထွက်ဗြီးလားခရေအကြောင်း၊ သူ့ခန္ဓာအလယ်ပိုင်းမှာလည်း မဲလို့ တုန်းလို့ ဧရာမ “ မျှို့” တစ်ကောင် တွဲလို့ပါလားခကြောင်း မျက်မြင်ကိုယ်တွိမြင်တွိလိုက်တေ အင်္ဂလိပ်စာ ပထမနှစ်က ကျောင်းသူချေတစ်စုက သတင်းပီးပို့ထားပါရေ။
နောက်ဆုံးအနိန်နန့် အားကစားသတင်းတစ်ပုဒ်ကို ကြေငြာတင်ပြပီးလားပါမေ။ လွန်ခရေ အပတ်က အင်္ဂလိပ်စာက ကျောင်းသားတိနန့် Physics ကကျောင်းသားတိ ဘောလုံးကဇာတ်ပွဲတစ်ပွဲကို ကျင်းပခကတ်ပါရေ။ ယင်းပိုင်ကဇာတ်ကတ်တေအခါ Physics က အင်္ဂလိပ်စာကို (၃)ဂိုး ဂိုးမဟိနန့် အနိုင်ရလားကြောင်း၊ ဒေကိစ္စနန့် ပတ်သက်လို့ မကျမနပ်ငြင်းခုံကတ်တေအခါ အင်္ဂလိပ်စာကျောင်းသားတိ၏ ထွက်ဆိုချက်အရ အင်္ဂလိပ်စာဘက်က ဂိုးဖမ်းဖို့လုပ်နိန်ဇိုင်မှာ Physics ကတစ်ယောက်က အင်္ဂလိပ်စာဂိုးသမား ကို( )ဖင်ကို အင်္ကျီခြုပ်အပ်နန့် ထိုးပခလို့ (၁)ဂိုး အသျှူးခံလိုက်ရကြောင်း၊ နောက်ထပ် (၁၅)မိနစ်ကြာရေအခါ ဂိုးသမား ကို( )စော် ဗောင်းတက်လားခရေ ဘောလုံးကိုမော်ကြည့်နိန်ဇိုင်မှာ ကျီးကန်းတစ်ကောင် ချီးစိုက်ချပခလို့ ဂိုးသမား ကို( ) မျက်စိမှာ ကျလားခကြောင်း၊ ယေနန့် နောက်ထပ် (၁)ဂိုး ပီးလိုက်ရကြောင်း၊ နောက်တစ်ဂိုးပီးလိုက်ရပုံမှာလည်း ဂိုးဖမ်းဖို့ပျင်စော်နန့် Physics က တစ်ယောက်က အင်္ဂလိပ်စာဂိုးသမား ကို( )ဘောင်းဘီအိပ်ထဲကို “ဖဗြုပ်ကေ” တစ်ကောင်ထည့်ပခလို့ ဂိုးသမားက “ဖဗြုပ်ကေ” ကို အပြင်သို့ထုတ်နိန်ဇိုင်မှာ နောက်ထပ် (၁)ဂိုး ပီးလိုက်ရကြောင်း ကြားသိရပါရေ။ အချိန်ကုန်ဖို့ မိနစ်ပိုင်းအလိုမှာ အင်္ဂလိပ်စာဘက်က အရှုံးနန့် ရင်ဆိုင်နိန်ရရေအတွက် အသင်း(၂)သင်း အကြိတ်အနယ်ယှဉ်ပြိုင်ကတ်တေအခါ အသင်း(၂)သင်း ဗြိုင်သတ်ပစ်လို့ ဘောလုံး (၂)ခြမ်းကွဲလားကြောင်းလည်း ကြားသိရပါရေ။ ယေခါ ဘောလုံးပိုင်ရှင်ဖြစ်တေ အင်္ဂလိပ်စာအသင်းဘက်က မကျေနပ်လို့ ကမ္ဘာ့ဘောလုံးအဖွဲ့ချုပ် “ ဖီဖာ (F I F A) ” ကို လားတိုင်ခီကတ်ပါရေ။ ယင်း ကမ္ဘာ့ဘောလုံးအဖွဲ့ချုပ် “ ဖီဖာ (F I F A) ” က အင်္ဂလိပ်စာအသင်းသားတိအတွက် နစ်နာကြေးအဖြစ် ရီချိုးစော် ဖလားတစ်လုံး ဆုချလိုက်ကြောင်း “ ဆိဆောက် ကရောက် ” သတင်းဌာနမှာ ဖော်ပြထားပါရေ....”

( သတင်းကြေငြာလို့ ဗြီး....)

“ ကျွန်တော်ရွီးထားစော် သတင်းကတော့ခါ ဒေလောက်ပါဗျာလ်.....။ ကောင်း မကောင်းလည်း မသိပါဗျာလ်ကား....”

( ပြောနိန်ဇိုင်မှာ တူအကြီးကောင်တက်လာ....။ အချေပုံသဏ္ဍာန်ပေါ်အောင် တစ်ခုခုကို အဝတ်ဖြူနန့် ထုပ်ဗျာလ် လက်မှာ ပိုက်ထား )

“ ယော်.....အခင်ထွီးက ဒေမှာ မနားယေ....”
“ အလိုဟိလာဝေ....”
“ အေး....သမီးချေကိုတစ်ခေါက် ယူထားလိုက်ယာ.....။ ကျွန်တော်ဆီးရုံကိုလားဗျာလ် ဒေသူ့အမိသည်ကို ထမင်းပို့ဇောင် လားရဖို့ဒေ...”
“ အေးအေး....ရရေ။ ပီးခ။ ပီးခ။ ”

( သမီးချေကို ဝရီးသည်ကို အပ်ထား )

“ ယကေ....ကျွန်တော်လားလီဖို့ဗျာလ်နန်း....”
“ အေး....လားလီ...လားလီ...”

( တူသည် ဆင်းလားလီ....။ ဝရီးသည် သမီးချေနန့်ကျန်လိုက် )

“ အင်း....သမီးချေ...သမီးချေ....အမိနန့်ရာ ကပ်လို့မနိန်ရ။ ဇာဖြစ်လို့ဟိဖို့လဲယေ....။ အားလုံးပြောပြလိုက်ဖို့ယာ။ တစ်ခါဂျီ။ နှစ်ပေါင်း(၂ဝ)ကျော်ကာလအထဲမှာ ကျွန်တော့်တူအကြီးကောင်စော် တစ်ရွာတည်းသမ ဝင်းမဖြူနန့် အိမ်ထောင်ကျဗျာလ် သားချေ(၂)ယောက်၊ သမီးချေ(၁)ယောက် ထွန်းကားခလီရေ။ သားချေနှစ်ယောက်မှာ တစ်ယောက်က (၆)တန်း၊ တစ်ယောက်က (၃)တန်း။ သမီးချေက အဂုမှ (၃)လရာ ဟိသိရေ။ သမီးချေကိုရလို့ (၂)လအကြာမှာ ဝင်းမဖြူရီပူလောင်ရေ။ ခန္ဓာတစ်စိတ်ကာမှာ ရီပူကျလားလို့ ဒဏ်ရာကအများ။ ဆီးရုံတင်လိုက်ရရေ။ ယင်းနောက်ပိုင်း ကျွန်တော့်တူတစ်ယောက်လည်း အလုပ်ပျက်၊ အကိုင်ပျက်ဖြစ်လားရေမနားယေ။ ဖြစ်ဖို့နန်းရာ။ ကျွန်တော့်တူက ဝင်းမဖြူအနားမှာ ဇာကားမလို၊ ဇာကားလို၊ ဝင်းမဖြူလိုသရွိ ဖြည့်ဆီးပီးနိန်ရရေ။ သမီးချေကလည်း ကျွန်တော်နန့်ဆိုကေ ကောင်းမလိုက်။ အဖမှ အဖ။ သား(၂)ယောက်ကတော့ စကေကြီးနိန်လို့၊ အသိဝင်နိန်လို့ ကောင်း အလိုမများ။ ကျောင်းလွတ်ကေ သူရို့မှာ အီးလို့ချေ ကဇာတ်နိန်ကတ်စော်ဗျာလ်။ ယေခါ ကျွန်တော့်တူမှာ ဝင်းမဖြူတစ်ဖက်၊ သမီးချေတစ်ဖက်နန့် ကိုယ့်အလုပ်ကို ကိုယ်ရာလုပ်ဖို့မရ။ အလုပ်လုပ်ဖို့မရကေ ဝင်ငွီကားမဟိယေ။ ဟိစော်ဖဲသာတိကိုလည်း ဝင်းမဖြူကို ဆီးကုလိုက်ရစော်မှာ တတုတ်ပြောင်လားရေ။ အိမ်မှာ ကျွန်တော်တစ်ယောက်ဟိနိန်လို့ ကံကောင်းသိယင့်။ ချက်ရေး ပြုတ်ရေးကိစ္စတိကို သူရို့စိုင်းဇားဖို့မလို။ ပတ်ဝန်းကျင်က အသိမိတ်ဆွီတိတော့ လာလို့ သတင်းမိန်းကတ်ယင့်။ ဆွီမျိုးတိကျကေ တစ်ကောင်လည်း မလာကတ်။ ကျွန်တော်ရို့ဖဲသာမဟိ၊ ဆင်းရဲတွင်းနက်နိန်လို့ ဟိဖို့။ အေး...ဆွီမျိုးဆိုစော်ကလည်း ဖဲသာဟိမှရာ ဆွီမျိုးတော်စော်။ ဖဲသာမဟိကေ ဇာဆွီမျိုးလည်း အရေးမစိုက်။ ဟုတ်တေမနားသမီးချေ....။ ယာ.....ဒေမမချေငို...ငိုနိန်ယာ။ မငိုကေ့...တိတ်....တိတ်.....။ ဗဂျီးသာခြင်းဆိုဗျာလ် ချော့သိပ်မေကား....။ အဘာဝါ.....အဘာနင့်မိဘားကို လားလီယင့်။ အမိဝါ....အမိ ဆီးရုံမှာ ဟိလီယင့်။ မောင်သျှင်ဝါ...မောင်သျှင်ဆွမ်းခံပျင်းလို့ အိပ်နိန်ယင့်....။ အဘာကြီးဝါဝါ...ပုဏ္ဏားကျွန်းက ကားစီးလို့လာ....ချစ်နှမသန္တာ....သဗုန်ခွက်နန့် ကွမ်းယာလို့လာ.....။ အင်း....ကြည့်ဇမ်...ချက်ချင်းအိပ်လားရေထော..။
ယော်.......မြင်တောင်မြင်သိလာဂု....။ ဒေမမချေလည်း ကျွန်တော်နန့်တူရေထော။ ဒေသူ့မှာလည်း အဂေါင်းနန့်...။ ကျွန်တော့်မှာလည်း အဂေါင်းနန့်။ ဒေသူ့မှာလည်း ပခုံးနန့်....။ ကျွန်တော့်မှာလည်း ပခုံးနန့်။ ဒေသူ့မှာလည်း လက်(၂)ချောင်းပါရေ....။ ကျွန်တော့်မှာလည်း လက်(၂)ချောင်းပါရေ။ ဒေသူ့မှာလည်း ဝမ်းပါရေ....။ ကျွန်တော့်မှာလည်း ဝမ်းပါရေ။ ဒေသူ့မှာလည်း “ချက်” ပါရေ....။ ကျွန်တော့်မှာလည်း “ချက်” ပါရေ။ “ချက်”အောက်ကိုချ ကြည့်လိုက်မေဇမ်....။ ယော်......မတူလိုက်ယာဂါ...။ ဟန်း....ဒေမမချေမှာ ပဇနှစ်ပေါက်ပါစော်မနားယေ....။ “ချက်”အောက်က ပဇကား ရပ်စောက်ထော....။ ကျွန်တော့်ကို ရပ်စောက်ရယ်ပြနိန်ရေ။ ဒေမမချေမှာ “ချက်” အောက်မှာလည်း ပဇပါကေ.....ကျွန်တော့် “ချက်” အောက်မှာဂါဂု....( အောက်ကိုငုံ့ကြည့်ဗျာလ်...) “ချက်” အောက်မှာ ပဇကားမပါ။ ခဲတံရာ တစ်ချောင်းပါရေမြင်ယင့်....”

( ပြောဗြီး စက်အောက်ကို ဆင်းလားလီ....)


.........
•*♥*• မာန်ယုကျော် ( ရွှေဝမြေ ) •*♥*•
.

( စင်မြင့်အောက်က အော်ပြော။ “ နှစ်ပေါင်း ၂ဝ ကြာရေအခါ ” လို့။ ဗြီးကေ ညီသည်လင်မယားတက်လာ။ ညီ မျက်မှန်တပ်ထား။ အကြီးပုံပေါက်အောင် )

“ ဟေး...မဘုစိန်....”

“ ဇာလေ အဖသည်...”

“ ဒေနိ ဇာနိလဲဟေ ”

“ ၂ဝ၁ဝ၊ သြဂုတ်လ ၂၄ ရက်ဒေ ”

“ အင်း.....ငါရို့အိမ်ထောင်ကျစော်လည်း ဒေနှစ်ဆိုကေ နှစ်ပေါင်း ၂ဝ တောင် ဟိဗျာလ်မနားယေ။ ”

“ အင်း....ဟုတ်တေကာနန်း....”

. “ နှစ်ပေါင်း ၂ဝ အတွင်း ငါရို့မှာ သားနှစ်ယောက်ရထားယာ။ သားနှစ်ယောက်ကို စစ်တွေက အဆင့်မြင့်ဘော်ဒါဆောင်မှာထားဗျာလ် ပိုင်ညာသင်ပီးနိုင်ရေ။ ရွာမှာ နွား (၁၇)ကောင်နန့် လယ်ဝါး(၁ဝဝဝ)ကျော်ဟိရေ။ အိမ်မှာ ဖုန်းလည်း တစ်လုံးဟိရေ။ အတိုင်းအတာတစ်ခုထိတော့ ငါရို့ဘဝပြည့်စုံနိန်ဗျာလ်။ ဗြီးကေ ဒေရွာမှာဆိုကေ ငါရို့က သူဌေးဗျာလ်။ ငါရို့ထက်က တစ်ကောင်လည်း မဟိ ”
“ ဟုတ်တေနန်းအဖသည်....ဘုစိန်ရို့ဘဝမှာ အရာရာပြည့်စုံသလောက်ဖြစ်နိန်ဗျာလ်။ ရွှီလည်း ဟိရေ။ ငွီလည်း ဟိရေ။ ဘုစိန်တော့ခါ ဘဝကို ကျေနပ်ယင့်ကား။ ”
“ ငါ အငယ်ခါ ဆင်းရဲခရေ....။ ကောင်းကောင်း ချမ်းသာချင်ခရေ။ အဂု ငါ ချမ်းသာနိန်ဗျာလ်....။ ကျွန်းသူဌေးဖြစ်နိန်ဗျာလ်။ အင်း....လောကမှာ ဖဲသာဟိကေ ဇာအရာမဆို ဖြစ်စော်ဗျာလ်ယေ....”
“ ယေကေလည်းအဖသည်....ဖြူစင်ရေ ချစ်ခြင်းမေတ္တတရားကိုတော့ ဖဲသာပီး ဝယ်လို့မရယေ....”
“ အာ......ဇာတိပြောနိန်လဲနင်....။ ငါရို့မှာ မေတ္တတရားဟိဖို့လည်း မလို။ ဝယ်ဖို့လည်း မလို။ ချချမ်းသသာနန့် နိန်နိုင်ကေ ဗြီးယာ။ မေတ္တတရားဆိုစော် အလကားရာဟေ....”
“ အေး....အဖသည်....ဒေနိခါ သားချေရို့ဘားက ဖုန်းလာဖို့ဟိရေ။ စောင့်ဖို့လားရဖို့ချ....”
“ အေးအေး။ လားလီလေ။ စောင့်ခီ။ ”

( ဖုန်းဟိရေ အိမ်ထက်သို့ မဘုစိန်တက်လားလီရေ။ ယောက္ဖသည် တက်လာရေ။ )

“ ယာ......ယောက္ဖ။ ဇာဇာ လားနိန်ခီလေ...”
“ ထော.....Second year က ကောင်မချေတိနန့် ဝှက်တမ်း ပုန်းတမ်း( hide and seek ) ကဇာတ်ခီစော်....”
“ ယကေ ကဇာတ်ဗြီးခယာလား.....”
“ ဗြီးတော့ မဗြီးကတ်သိ။ ယေလည်း ယင်းကောင်မချေတိ ကောင်းကောင်းချငြင်းပူရေဝေး.....။ ငါဂျေး....အပုပ်လုပ်ရရေ။ ယေဇူးနန့် ဆက်မကဇာတ်ဘဲ ပြန်ပါလတ်စော်ဒေ ”
“ အော်....ဟုတ်လာ....”
“ အင်း....။ အဝေး....ယောက္ဖ ! ”
“ ဇာလေ....”
“ ငါ တစ်ခုပြောရဖို့သိ ”
“ ဇာလေယောက္ဖ ”
“ ညဇာက နိခင်းဘက် ငါ....ဈီးကို တစ်ခေါက်လားခီရေ.....”
“ ဇာလုပ်ခီစော်လေ။ ဘရာဇီယာဝယ်ခီစော်ဟန်....”
“ အဟင့်။ ဇာကရာတစ်လုံးလားဝယ်ခီစော်...အာ....မှားလားယာ။ မဟုတ်။ သူငယ်ချင်းတစ်ယောက်ကို လားတွိခီစော်ထော။ ”
“ သူငယ်ချင်းက ဈီးမှာ နိန်စော်လား ”
“ မဟုတ်.....”
“ ယကေ .... ဇာမှာ.... ”
“ ထိုဘက်ရွာမှာ...”
“ အမ်....ထိုဘက်ရွာမှာဟိစော်သူငယ်ချင်းကို ယင်းရွာမှာ လားမတွိဘဲ ဈီးကိုလားဖို့လိုလား ”
“ မဟုတ်လဲဝေ.....ထိုဘက်ရွာကို တိုက်ရိုက်လားဖို့ဆိုကေ (၁၅) မိနစ်လောက် ကြာဖို့။ ဈီးက ပတ်လို့ လားကေ (၁း၃ဝ) တစ်နာရီနန့် အခွဲကြာရေ။
“ ယကေ .... ”
“ ယင်းတွက်နန့် အယင်ရောက်ပတ်ဇီဆိုဗြီးကေ ဈီးဘက်က ပတ်လို့ လားခီစော်....“
“ ကထိုက်ကရိုက်ရာမနား။ ဒေယောက္ဖတစ်ယောက်လည်း...။ ကြားကတ်ပါလာပရိသတ်တိ။ ထိုဘက်ရွာကို တိုက်ရိုက်လားကေ (၁၅) မိနစ် ကြာပါရေလတ်။ ဈီးဘက်က ပတ်လို့လားကေ (၁း၃ဝ) တစ်နာရီနန့် အခွဲကြာပါရေ။ အယင်ရောက်အောင်အတွက် ဈီးကပတ်လို့လားခီပါရေလတ်ယေ။ ဘလောက်လည်းချကြည့်....”
“ အဝေး....ပြောချင်စော်က ယင်းချင့်မဟုတ်။ ကောင်း အရေးကြီးရေ....”
“ ဟုတ်လာယောက္ဖ။ စိတ်ဝင်စားလာဗျာလ်ကား။ ပြောဖိ ”
“ ငါ....ဈီးကိုလားရေခါ.....လမ်းမှာ စကက်အတိုချေနန့် ကောင်မချေတစ်ယောက်ကို မြင်ခရေဝေး.....။ ယင်းကောင်မချေစော် ဆိုက္ကားနန့်။ ကောင်း အလှပေချေဝေး...ဈီးကလာစော်ဟိဖို့ ”
“ အင်း....ယကေ ဇာဖြစ်လေ....”
“ ငါက အလား....။ ယင်းကောင်မချေက အလာ....။ လီဆန်ဖြစ်တေအတွက် ယင်းကောင်မချေစီးလာစော် ဆိုက္ကားက တိုးလို့မရွိ....”
“ ယကေ .... ”
“ လီက တိုက်နိန်ရေအတွက် ယင်းကောင်မချေမှာ ပါလာရေ ပစ္စည်းတိစော် လန်နိန်ရေ....”
“ အဘာလေ.....ကောင်းခန်းကိုရောက်လာယာ။ ဆက်ပြောယောက္ဖ....ဆက်ပြော....အဟဲ....”
“ အားပါစော်....အားပါစော်....။ ကိုယ်က သားနှစ်ယောက်နန့် ဝါဂျီးဖြစ်နိန်ယာ.....”
“ အသက်ကြီးကေလည်း မပျက်စီးသိမ့်လေယောက္ဖ။ စက်ကောင်းသိရေ။ ပြော...ပြော။ ”
“ ယင်း လန်နိန်စော်နိန်ရာကို ငါကြည့်လိုက်တေအခါ.....ယင်းကောင်မချေမှာ ထိုးဖို့အောက်စက်မပါ။ ”
“ လားဗျာလ်မနားယေယောက္ဖ။ အောက်စက်မပါကေ အလုပ်က မဖြစ်....”
“ အေးလေဝေ.....ယင်းအောက်စက်က ကကောင်းအရေးကြီးရေ.....ယင်းလောက် အဓိကကျရေအောက်စက်ကမှ ယင်းသူ့မှာ ပါမလာ။ ဇာအတွက်လဲမသိဗျာလ်....”
“ ယောက္ဖ ”
“ ဝေး.....”
“ ယင်းကောင်မချေမှာ အောက်စက်မပါစော် မွီးခါကပင် ဟိဖို့ယေနန်း.....”
“ ဇာဖြစ်လို့လဲဝေး.....”
“ ဟုတ်တေလေ....ဒေလောက်အသက်အရွယ်ရောက်လာဗျာလ်....။ အောက်စက်မပါဆိုကေ မွီးခါကပင် ယင်းကောင်မချေမှာ အင်္ဂါမစုံစော်ချင့်....”
“ ယာ.....မင်း အထူးထူးကာရ ပြောနိန်ရေကာ....။ ငါပြောစော် အောက်စက်နန့် မင်းပြောစော်အောက်စက် လွဲနိန်ဗျာလ်ထင်ရေဝေး.....”
“ ယောက္ဖ ဇာအောက်စက်ကို ပြောစော်လဲ.....”
“ DVD အောက်စက်ကို ပြောစော်ဝေး......”

( ယောက္ဖသည် နဖူးကိုခပ်ဗျာလ်ပြော )

“ အူး.....သီရေမနားယေယောက္ဖ ”
“ ယင်းနိက.....ယင်းကောင်မချေနန့် တူတူဆိုက္ကားနောက်မှာ T V တစ်လုံးတင်လို့ပါရေလေဝေ...အင်ဗာတာတိလည်း ပါရေ....။ ဝယ်ခစော်သိဟိဖို့။ အားလုံးဂြုပ်ခွံတိနန့်။ ပါကင်ပိတ်ပြီးသား။ ယေလည်း ယင်းမမချေမှာ ခွေထိုးဖို့ အောက်စက်မပါ....”
“ အူး....ယောက္ဖက DVD အောက်စက်ကိုပြောစော်မနား။ အဓိပ္ပာယ်ကောက်စော်မှားလားရေထော.....သီရဖို့။ ကိုင်း.....ကိုင်း.....ယောက္ဖရောက်လာစော်နန့် အတော်ဗျာလ်...”
“ ဇာလုပ်ဖို့ငါ့ကို....”
“ ဂွထော်စိန်အိမ်မှာ ကျွန်တော့်နွားမ ဝမ်းကြီးမတစ်ကောင် ဝပ်နိန်ရေလို့ ပြောသံကြားရေ။ မွီးဖို့ဗျာလ်လာမသိ။ တစ်ခေါက်ချေ လားကြည့်ကတ်မေ ”
“ အေးအေး...လားလား....”

( သမီးယောက္ဖနှစ်ယောက် ဆင်းလားလီကတ် )

........
•*♥*• မာန်ယုကျော် ( ရွှေဝမြေ ) •*♥*•
.

** **

(ညီအစ်ကိုနှစ်ယောက်တက်ဗျာလ်ပြော)

“ အစ်ကိုကြီး..... ”

“ ဇာလဲဝေး.....”

“ ကျွန်တော်ပြောစရာတစ်ခုဟိရေဂါး.....”

“ ဇာပြောဖို့စော်လဲ။ ပြောလေ.....”

“ ထိုချင့်လေ.....ထို......ထို......”(ဂေါင်းကိုခြစ်ဗျာလ်)

“ ပြောလဲဝေ.....”

“ ထို.....ထို.....ကျွန်တော်မယားယူချင်လို့....ဟဲ.....ဟဲ.....”

“ အမ်...ဇာဟင့်....။ မင်း မယားယူဖို့ ?? ”

“ အင်း......”

“ ဇာသူလဲ။ ဇာကလဲ....”

“ မဘုစိန်။ ကျွန်တော်ရို့ third year ကဗျာလ်.....”

“ အော်....ယင်းကောင်မချေလား.....”

“ အင်း.....ဟုတ်တေ ”

“ ကိုင်း....မင်းမယားယူဖို့ဆိုကေကားရဗျာလ်ဝေး။ တက္ကသိုလ်လည်း မဗြီးသိဂါ။ အရာ တစ်နှစ်လိုသိယင့်။ ”

“ ထားအစ်ကိုကြီး.....ထား။ ယင်းတက္ကသိုလ်ကို မတက်ချင်ဗျာလ်။

. “ ဇာဖြစ်လို့လဲဝေး....ယာ......”
“ ဇာဖြစ်လို့ဟိဖို့လဲယေအစ်ကိုကြီး....တက္ကသိုလ်တက်ခီကားမဟုတ်။ ထိုချင့်မဝတ်ရ၊ ဒေချင့်မဝတ်ရ၊ ထိုနိန်ရာမလားရ၊ ဒေနိန်ရာ မလားရနန့် ကောင်း ချုပ်ချယ်လွန်းအားကြီးရေ ”
“ ဟုတ်ယင့်လားဝေး.....”
“ ဟုတ်တောင်ဇာကဖို့သိလဲယေအစ်ကိုကြီး.....။ အရာ နောက်ခါဆိုကေ Canteen မလားရ၊ အစာမစားရ၊ ရီမသောက်ရလို့ ဖြစ်ချင်ကေ ဖြစ်လာဖို့သိ....”
“ အေးဂါဝေး.....အဂုတက္ကသိုလ်အခြေအနေ ကောင်း ဆိုးလားရေထော။ အစ်ကိုကြီးရို့အငယ်ခါ ရွာက တက္ကသိုလ်တက်ဖူးရေ လူကြီးတိပြောကတ်စော်က တက္ကသိုလ်ဆိုစော် လလွတ်လလပ်ဗျာလ်လတ်။ ကိုယ်ပိုင်လွတ်လပ်ခွင့် ဟိရေဆိုဝါ....။ အပိတ်အပင် အတားအဆီးမဟိလတ်ဝေး.....”
“ အူး.....အဂု တက္ကသိုလ်တက်ရစော်က အစ်ကိုကြီး.....ထောင်ကျနိန်စော်ထက် ဆိုရေ။ အဟြင်ငရဲကျနိန်စော်မနားချင့်.....”
“ ကိုင်း.....ကိုင်း......ဟုတ်ဗျာလ်။ လက်ရှိအခြေအနေမှာ မင်းစော် ကျောင်းလည်းမဗြီးသိ။ အလုပ်မဟိ အကိုင်မဟိ။ မင်းမယားယူကေ ဇာနန့် လုပ်ကိုင်စားသောက်ကတ်ဖို့လဲ ”
“ အူး.....ဒေချင့်ကို အစ်ကိုကြီး စိတ်မပူကေ့။ ကျွန်တော်ဆိုစော်အကောင်က မပိုင်ကေ နန္ဒာလှိုင်ကိုတောင်မှ စိုင်းဇားဖို့အကောင်မဟုတ်။ ဒေဂု ကျွန်တော်နန့် မဘုစိန်ရို့ရကေ သူရို့မိဘတိက ကျွန်တော်ရို့နှစ်ယောက်ကို နွား(၁) သျှိုင်းနန့် လယ်ဝါး (၆ဝဝ) ကို လက်ဖွဲ့ဖို့လတ်....ကျွန်တော်ရို့ဘက်က တစ်ခုလည်း မလိုလတ်အစ်ကိုကြီး။ အားလုံး သူရို့စီဇိုင်ပီးဖို့ဆိုဝါ....”
“ ဟုတ်လာဝေး....”
“ အင်း....ယေဒါလည်းအစ်ကိုကြီး....ခြုပ်မသျှင်ဘက်ကဂျေး အားလုံးခံနိန်ကေလည်း မကောင်းမနားယေ ”
“ အေး....ဟုတ်တေနန်းရာ...”
“ ယင်းတွက်နန့် ကျွန်တော်ရို့ဘက်က မင်္ဂလာပွဲအခမ်းအနားအတွက် တာဝန်ယူပီးကေ ကောင်းဖို့လားမသိ ”
“ အေး....ကောင်းရေ.....ကောင်းရေ.....ငါရို့ဘက်ကလည်း တစ်ခုခုတော့ လုပ်ပီးရဖို့ဗျာလ်ကားယေ.....”
“ ယကေ အစ်ကိုကြီး....အစ်ကိုကြီးလည်း မြင်ရေအတိုင်းယာ။ ကျွန်တော့်မှာ အဂု အလုပ်လည်း မဟိ။ ဝင်ငွီလည်း မဟိ။ ယင်းအတွက်နန့် ကျွန်တော့်အနိန်နန့် မင်္ဂလာပွဲအတွက်......”

(အစ်ကိုသည် ကြားဖြတ်ဝင်ပြော)

“ အစ်ကိုကြီးသဘောပေါက်တေငါ့ညီ....။ မင်းရို့မင်္ဂလာပွဲအတွက် ကုန်ကျစရိတ်ကို မင်းမကြောင့်ကြကေ့။ အစ်ကိုကြီးတာဝန်ယူပီးမေ။ အစ်ကိုကြီးမှာ စုထားစော် ဖဲသာစကေ ဟိရေ။ ယင်းဖဲသာနန့် မင်းရို့မင်္ဂလာပွဲအတွက် အစ်ကိုကြီး စီဇိုင်ပီးမေ....”
“ အစ်ကိုကြီးအဂင့်ပြောစော်လားချင့် ”
“ အင်းလေ....”
“ ယင်းတွက်နန့် အစ်ကိုကြီးကို အားကိုးစော်.....”
“ ယေနန်းရာဝေ....တစ်သက်မှာ ဒေညီနန့် ဒေအစ်ကိုနှစ်ယောက်တည်းရာဟိစော်....။ ညီမှာဟိကေလည်း ညီစား။ အစ်ကိုမှာ ဟိကေလည်း ညီစား။ ဟဲ....ဟဲ....။ အလကား ပြောစော်ရာ....။ အစ်ကိုမှာ ဟိကေလည်း ညီမှာဟိစော်ဗျာလ်ကားယေ။ ယင်းတွက်နန့် မင်းရို့မင်္ဂလာပွဲ စည်ကားဖို့ရဖို့ဝေး.....”
“ ယင်းပိုင်ဆိုကေ အစ်ကိုကြီး....မင်္ဂလာပွဲကိစ္စအတွက် မဘုစိန်နန့် ကျွန်တော်တိုင်ပင်ဆွေးနွေးဖို့ လားလီဖို့ဗျာလ်ဒေ.....”
“ အေး....အေး....လားလီ....လားလီ.....”

( ညီသည် ပပျော်ရဟြွှင် ဆင်းလား )
( အစ်ကိုသည် ဆက်ပြော )

“ အင်း......ကျွန်တော့်ညီတစ်ယောက်တောင် အသက်(၂ဝ)ကျော်လို့ မယားတောင်ရဖို့ဗျာလ်ထော.....”

( ပြောနိန်ဇိုင်မှာ ဝရီးလုပ်တေသူ(ကျွန်တော်) ဒယောတိကို ပင့်ပနာ မာန်နန့် ဆန်နန့် တက်လာ )

“ ဇာတိရစ္ဆာန်ကိုလည်း လူလို့ ထင်စော်အကောင်မဟုတ်နန်း.....သတ္တိဟိကေ စင်ထက်ကိုတက်ပါလတ်။ ငါ့ပေါင်ကို အောက်ကထားလို့ ပေါင်းချင်းထပ် ထိုးဖို့.....”
“ ဇာဇာ ဖြစ်လာလေ အခင်ထွီး....”
“ ဇာဖြစ်ဖို့လဲဝေး.....ငါ့ကို နေတိုးနန့် တူရေတူရေလို့ လိုက်ပြောနိန်ကတ်တေလေဝေ....”
“ ဟုတ်တေလေ....တူရေဝါယေနေတိုးနန့်....နှာခေါင်းတစ်လုံးလွဲ ကျန်စော် တစ်ခုလည်း မတူ.....”
“ ဒေလောက် ဟိန်းဝေယံနန့် တူစော်အကောင်ကိုမှ နေတိုးနန့် တူရေလို့ဆိုရဖို့လား။ အဓိပ္ပယ်မဟိစော်။ ငါ့ကို အားမနာစော်မလားချင့်။ ယင်းနန့် ပြောစော်အကောင်တိ အားလုံးကို မျက်စိနှိပ်လို့ ထိုးသတ်ပခရေ။ မှတ်လီ.....”
“ အိုးဘာလေး....ဟုတ်လာအခင်ထွီး....ဇာနန့်ပင်လည်း ထိုးပခလေချင့်.....ဘုရား....ဘရား....”

( ခါးမှာ ထိုးထားရေ ဓါတ်တောင့်ကို ထုတ်ပြဗနာ ဝရီးသည်ပြောလိုက်တေ)

“ ဓါတ်တောင့်နန့်......ဟဲ.......ဟဲ........ဟဲ ”
“ အူး........ဒေအခင်ထွီးတစ်ယောက်လည်း ကောင်းရာမနား။ ယကေ.....အမိတစ်ယောက် အိမ်မှာ ဟိယင့်လားအခင်ထွီး....”
“ အေး....ထမင်းချက်ကျန်လိုက်ယင့်ယေ.....”
“ ယော်........အခင်ထွီးမချက်ခလား။ အမိက ကောင်း နိန်ကောင်းစော်မဟုတ်။ ”
“ အေးလေးဝေ....ငါ ဈီးပြုပြီးစော်နန့် ငါချက်ဖို့လုပ်စော်ရာ။ ယေခါ မင်းအမိလာဗနာ သူချက်လိုက်မေလတ်။ ငါ အပါအဝင် မင်းရို့နှစ်ကောင်ကို ဒေနိခါ သူချက်ကျွေးချင်ရေဆိုဝါ....”
“ အော်.....ယပိုင်လား။ ကောင်းရေဝါယေ....အမိလက်ရာကိုလည်း မစားရစော် ကြာနိန်ယာ။ ဒေနိတော့ ပဖြဲ နဖြဲစားပလိုက်မေချ။ ”
“ အင်း.....”
“ ယကေ အခင်ထွီးကို ပြောစရာတစ်ခုဟိရေဒေ....”
“ ဇာလဲဝေး....ငါ့ကို မယားပီးစပ်ဖို့အကြောင်းလား ”
“ ဇာကလာ........မဟုတ် ”
“ ယကေ....?? ”
“ ကျွန်တော့်ညီ မယားယူဖို့ဆိုဝါ....။ ကျွန်တော့်ကို လာတိုင်ပင်နိန်ရေ။ ”
“ အူး........ငါသိပြီးဗျာလ်။ ယင်းသူ ညဇာက မင်းမိနန့် ငါ့ကို ပြောပြီးဗျာလ်။ ငါရို့က မင်းဘားသို့ လွှတ်လိုက်စော် ”
“ ဟုတ်လာ....”
“ အင်း.....။ ယကေ မင်းဆန္ဒက ဇာပိုင်လေ....”
“ ပီးစပ်လိုက်ရဖို့ယာမနားယေ။ ”
“ ပီးစပ်စော်က ဟုတ်ယာဝေး.....။ ငါရို့မှာက တစ်ခုလည်း မဟိ။ ထမင်းပင်ကား မင်းတစ်ယောက်ဟိနိန်လို့ စားနိန်ရစော် ”
“ ကျွန်တော်ရို့ဘက်ကတော့ တစ်ခုလည်း မလိုလတ်။ ယေဒါလည်း မကောင်းလို့ မင်္ဂလာပွဲအခမ်းအနားအတွက် ကုန်ကျစရိတ်တိကို ကျွန်တော်တာဝန်ယူပီးလိုက်တေ....”
“ ယကေ မင်းမှာ ဖဲသာဟိရေလို့လား ”
“ ကျွန်တော့်မှာ စုထားစော် ဖဲသာစကေ ဟိရေ ”
“ ကြည့်ဇမ်.....ယင်းဖဲသာဟိစော် ငါ့ကို လုံးဝမပြောထောဒေသူ....”
“ ဇာဖို့ပြောဖို့လဲ။ အခင်ထွီးကို ပြောလိုက်ကေ အရက်သောက်ဖုိ့တောင်းဖို့၊ ပြီးကေ ရွာထဲက ကွမ်းယာဆိုင်သည်မှ ဒေါင်းလှခိုင်ကို သျှရေပန်းတိ ဝယ်ပီးဖို့။ မသိမှတ်လာ.....”
“ အာ.....လူတိသျှင်တိကြားလားပါမေဝေ.....ထားဖိထားဖိ။ ယကေ ယင်း မင်းစုထားစော်ဖဲသာတိကို မင်းညီအတွက်ဖြည့်ဆီးပီးလိုက်ဖို့ပါ့ ”
“ ယေနန်းရာအခင်ထွီး....။ တစ်သက်မှာ ဒေညီနန့် ဒေအစ်ကိုနှစ်ယောက်တည်းရာဟိစော်။ အစ်ကိုမှာ ဟိကေလည်း ညီမှာ ဟိစော်ဗျာလ်ကားယေ။ ကျွန်တော်... ညီကို ကကောင်း ချစ်တေ။ ညီအတွက်ဆိုကေ ဇာပင်မဆို ပီးဆပ်ဖို့အဆင်သင့် ”
“ အင်းဝေ....ကောင်းရေကောင်းရေ။ ညီအစ်ကိုနှစ်ယောက် ချချစ်ခခင် နိန်ကတ်။ ”
“ ကိုင်း.......အခင်ထွီး.....ကျွန်တော်လည်း အလုပ်လားရဖို့ဗျာလ်ဒေ။ လားလိုက်ဖို့ယာနန်း....”
“ အေးဝေး.....ကောင်းယင့် ”

( တူသည် ဆင်းလားလီ။ ဝရီးသည် တစ်ယောက်တည်း ပြောကျန်လိုက် )

“ အင်း.......ပန်းထိမ်ဆရာ......ပန်းထိမ်ဆရာ......။ ညီကိုတော့ခါ ကကောင်းချစ်တေမြင်ယင့်ထော။ ဒေသူရို့အကြောင်းလား ?? တစ်ခေါက်ချေလောက် ပြောပြပီး ?? အော်... ဒေသူရို့အကြောင်းကို သိချင်ကတ်လာ။ အေးအေး...ပြောပြမေ။ ဒေသူရို့မှာ အမိအိုရာ ဟိဗြီးကေ အဖသည် သီလားစော် ဒေနှစ်နန့်ဆိုကေ (၈)နှစ်လောက်ဟိပါဗျာလ်ဒေ။ အဖသည်သီလားဗြီးရေနောက်ပိုင်း ဒေပန်းထိမ်ဆရာတစ်ကောင်လည်း ကိုးတန်းနန့် ကျောင်းထွက်လိုက်ရရေ။ သူ့အဖသည် မသီခင် သင်ပီးခရေ ပန်းထိမ်ပိုင်ညာနန့် အမိအိုနန့် ညီတစ်ယောက်ကို ဟြာဖွီကျွေးမွီးနိန်ရရေ။ ကျွန်တော့်မှာလည်း အလုပ်အကိုင်မဟိရေအတွက် ယင်းသူရို့အိမ်မှာ ဝင်နှက်တေ။ ကျွန်တော်နန့် သူရို့အမိနန့်က မောင်နှမအရင်းတိလေ။ အမိမတူ ၊ အဖကွဲတိ။ ဟဲဟဲ...။ အလကား ပြောစော်ပါရာ။ အဂင့်မောင်နှမအရင်းတိပါ။
ကျွန်တော့်တူအကြီးကောင်ကို သူ့အမိသည်က မယားယူဖို့ပြောနိန်ဗျာလ်။ ယေဒါလည်း ယင်းသူက မယူချင်သိဆိုဝါ...။ မိသားစုကို ပြန်ကြည့်ရေ။ အမိသည်က ကောင်း နိန်ကောင်းစော်မဟုတ်။ ရက်ပြတ် ဆီးတိနန့် အုံနိန်ရရေ။ ညီ တက္ကသိုလ်တက်ဖို့စော်ကိုလည်း ထောက်ပံ့ရသိရေ။ ကျွန်တော့်ကိုလည်း အားကိုးမရ။ အလုပ်မဟိ၊ အကိုင်မဟိ။ အလုပ်မဟိစော်က မှန်ပါရေ။ အကိုင်တော့ ဟိပါရေထော။ အိုးတိကို ရက်ပြတ်ဂျေး ကိုင်နိန်ရရေ။ တစ်မျိုးမထင်ပါကေ့နန်း။ သူရို့အိမ်မှာ ကျွန်တော်က ထမင်းချက်ရီခတ်လေ။ ထမင်းချက်ဖို့ဆိုကေ အိုးတိကို မကိုင်ရ၊ မတွယ်ရလား....။ ယင်းချင့်ကိုပြောစော်ပါရာ။ အူး......တစ်ခုဆိုကေ အဓိပ္ပာယ်တလွဲ ကောက်ကတ်ဗျာလ်ယေ။ ကျွန်တော်အလုပ်ကို မဟြာစော်တော့ မဟုတ်ပါနန်း။ အလုပ်က ကျွန်တော့်ကို လာမဟြာလို့ ကျွန်တော့်မှာ အလုပ်မဟိဖြစ်ရစော်။ ယင်းပိုင်....အေးမသည်အိမ်မှာ ထမင်းစား ဝမ်းပူ....။ မယားလည်း မရ၊ ကျားလည်း မကိုက်သိဒေ....။
ထော....ဒေဂု....ကျွန်တော့်တူ အငယ်ကောင်....မယားယူဖို့ယာဆိုဝါ....။ တစ်ခန်းတည်းက မဘုစိန်နန့်လတ်။ အေး....ယင်းကောင်မချေရို့မှာလည်း မောင်နှမ နှစ်ယောက်တည်းရာဟိစော်ယေ။ ကျွန်တော်ရို့ရွာနန့် သူရို့ရွာစော် တစ်ဘက်တစ်ကမ်း ကျရေ။ အငယ့်ချေကပင် ကျွန်တော့်တူနန့် ကြိုက်နိန်ကတ်စော်။ ကြီးလာလို့ ချိန်းကတ်တေခါ ကျွန်တော်တောင် တစ်ခါတစ်ရီ အတွဲချောင်းဖူးယင့်။ ဟဲဟဲ။ ကျွန်တော့်တူက ကောင်း လက်သရမ်းစော်မနား။ တစ်ရက်နိကပါလေ... ယင်းသူရို့ ချိန်းကတ်စော်ကို ကျွန်တော်ချောင်းကြည့်နိန်ဇိုင်မှာ ယင်းအကောင်စော် မဘုစိန်အိုးထဲက အစိတိကို နှိုက်ပနာ ယူစားပလိုက်စော် မဘုစိန်အိုးထဲမှာ ဟိစော်အစိတိ တတုတ်ပြောင်လားရေ။ ဇာလေ..လွဲဗျာလ်ယေအဓိပ္ပာယ်....။ တစ်မျိုးမထင်ကေ့။ မဘုစိန်မှာ ပါလာရေ ရီအိုခွက်ထဲက ရီခပ်ခါ စားဖို့ယူလာရေ ပဲစိတိကို ယူစားစော်ကို ပြောစော်ရာ။
အင်း......ပြောရဖို့သိ။ ကျွန်တော့်တူအငယ်ကောင်က ဇာပြောမှတ်လဲ။ နှစ်ပေါင်း(၂ဝ)ကျော် အောင့်အီးဗြီးကေ ပါလတ်စော် ဒေဂု သူမယားရဖို့ဗျာလ်ဖြစ်လို့ ကောင်း ပျော်ပါရေလတ်ထော။ ယဗြီးကေ သူ ကောင်း အလုပ်လုပ်ချင်နိန်ပါဗျာလ်လတ်။ မပုစ်ိန်နန့် ရမှရာ သူ အလုပ်လုပ်လီရဖုိ့ဗျာလ်ဆိုယင့်။ ဇာအလုပ်ကိုပြောစော်တော့ခါ ကျွန်တော်လည်း မသိပါဒေ။ အလုပ်က နှစ်မျိုးဟိရေမဟုတ်ပါလာ။ တစ်မျိုးကတော့ လင်နန့် မယားရကတ်ကေ စီးပွားဥစ္စာတိုးပွားဖို့ လုပ်ကတ်တေအလုပ်။ နောက်အလုပ်တစ်ခုက တော့ခါ......တော့ခါ.......တော့ခါ.......ဟဲ..ဟဲ...ကျွန်တော်မပြောပြချင်ပါဗျာလ်။ ပရိသတ်ရာ တွေးကြည့်လီကတ်ပါဖိ....”

( ဝရီးသည် ဆင်းလား )

.......
•*♥*• မာန်ယုကျော် ( ရွှေဝမြေ ) •*♥*•.

( ဤပြဇာတ်ကို ကျွန်တော် Final year ၏ အာစရိယပူဇော်ပွဲတွင် တင်ဆက် ကပြ ဖြေဖျော်ဖို့ ရည်ရွယ်ခပါရေ။ ယေဒါလည်း ပါမောက္ခချုပ်နန့် ပါမောက္ခတို့၏ ခွင့်ပြုချက်ကို မရခပါ။ ယင်းတွက်နန့် ကျွန်တော့်ရည်ရွယ်ချက် မအောင်မြင်ခပါ။ ဒေပြဇာတ်ကိုရာ ကျွန်တော်ပြသခွင့်ရခဖုိ့ဆိုကေ ကျွန်တော် ကောင်း ကျေနပ်ပါဖို့။ လူသားတိရင်ထဲကိုလည်း ချစ်ခြင်းမေတ္တာတရားကို တန်ဖိုးထားတတ်လာအောင် ထည့်သွင်းပီးရာရောက်ပါဖို့။ ဒေပြဇာတ်စော် ကျွန်တော်ရွီးထားရေ မုဒိတာစမ်းရီအိုင် ဝတ္တုတိုချေကို ပြဇာတ် လုပ်ထားစော်ပါ။ ဒေဝတ္ထုထဲမှာ (သို့) ပြဇာတ်ထဲမှာ ညီအစ်ကိုနှစ်ယောက်၏ ချစ်ခြင်းမေတ္တာကို ဖော်ကျူးထားပါရေ။ ဖတ်ကြည့်ကေ သိလာပါလိမ့်မေ။ ဖတ်ကြည့်ပါ။ ဖတ်ဗြီးကေ ကျွန်တော့်ကို ဝေဖန်ပါ။ အကြံပြုပါ။ ဆွေးနွေးပါ။ တိုင်ပင်ပါ။ ပရိသတ်တိ ဆွေးနွေးဝေဖန်အကြံပြုချက်တိကို လက်ကမ်းကြိုဆိုနိန်ပါရေ။ ကျေးဇူးတင်ပါရေ။ )

. ဝတ္ထု၊ ဇာတ်ညွှန်း၊ စာသား၊ ဒါရိုက်တာ - မာန်ယုကျော်(ရွှေဝမြေ)

မုဒိတာစမ်းရီအိုင်

ဇာတ်ညွှန်း -

အခန်း(၁) - ညီအစ်ကိုနှစ်ယောက်တက်ပြော၊ ညီဆင်းလား။ ဝရီးသည်(ကျွန်တော်)ရန်ဖြစ်ပနာ တက်လာ။ တူမိသားစုအကြောင်းကိုပြော။ ရယ်စရာပြောဗျာလ်ဆင်းလား။
အခန်း(၂) - နှစ်ပေါင်း(၂ဝ)ကြာဗြီးရေနောက် - ညီသည်လင်မယားတက်ပြော။ မယားသည်ဆင်းလား။ ယောက္ဖသည်တက်ဗျာလ် ရယ်စရာပြော။ (၂)ယောက်လုံးဆင်းလား။
အခန်း(၃) - ဝရီးသည်(ကျွန်တော်)တက်ဗျာလ် သတင်းကြေငြာ။ တူသည်အကြီးအကောင် သမီးချေကို ဝရီးနန့် ထားပစ်ခ။ သူဆီးရုံကိုလား။ ဝရီးသည်အချေကို ချော့သိပ်။ ရယ်စရာလုပ်ပြ။ တူမိသားစုအကြောင်းကိုရှင်းပြ။
အခန်း(၄) - ဝရီးနန့် ယောက္ဖတွိ။ ရယ်စရာပြောကတ်။ အရက်သောက်ဗျာလ်ပညာပြိုင်။
အခန်း(၅) - ဝရီးတက်ဗျာလ်ဖုန်းပြော။ တူသည်သမီးချေနန့်တက်လာဗျာလ် ညီသည်ဘားကို အကူအညီလားတောင်းဖို့ပြော။ သဘောတူကတ်။
အခန်း(၆) - အစ်ကိုသည် သူ့သမီးနန့် ညီကိုလားတွိ။ အကူအညီတောင်းနိန်ဇိုင်မှာ အနားမှာ ဟိရေ ဖုန်းလာ။ မယားဖုန်းပြော။ အစ်ကိုအဆင်မပြေ။ မျက်နှာငယ်ငယ်နန့် ဆင်းလာ။
အခန်း(၇) - အစ်ကိုသည် အချေနန့် တက်လာ။ သူ့ကို သူ့ညီဥပေက္ခပြုကေလည်း သူ့မုဒိတာစမ်းရီစော် ခမ်းလီဖို့မဟုတ်ကြောင်း ပြောဗျာလ်ဆင်းလား။
အခန်း(၈) - အရက်ပုလင်းကိုကိုင်ဗျာလ် ဝရီးနန့် ယောက္ဖတက်လာ။ လူ့ဘဝအခက်အခဲတစ်ချို့ကိုပြော။ လောကီလူ့ဘောင်ကို စွန့်ဗျာလ် ဘုန်းကြီးဝတ်ဇောင်လား။

ပြီး !

.......
•*♥*• မာန်ယုကျော် ( ရွှေဝမြေ ) •*♥*•.